Friday, August 10, 2012

Children’s Park magiging dagdag atraksyon sa Sorsogon City Park


Ni: Bennie A. Recebido

LUNGSOD NG SORSOGON, Agosto 9 (PIA) – Unti-unti nang nagiging popular at paboritong pasyalan ng mga tao, bata man o matanda, pamilya man o indibidwal ang City Park sa Sorsogon City Complex sa Brgy. Cabid-an, Sorsogon City.

Bunsod nito at sa kagustuhan ni Sorsogon City Mayor Leovic R. Dioneda na gawing mas kaakit-akit pa ang paglalaro dito at pamamasyal ng mga bata, naisipang magpatayo ng alkalde ng Children’s Park sa kaliwang bahagi ng Sorsogon City Hall sa Brgy. Cabid-an.

Ayon sa alkalde, palalagyan nya ng siyam na mga yunit ng playhouse at 20 pirasong life size na mga rebulto. Ang mga rebulto ay kakatawan ng iba’t-ibang mga propesyon tulad ng guro, pari, doktor sundalo, pulis, inhenyero at marami pang iba na magsisilbing inspirasyon sa mga bata sa kanilang paglaki at hihikayat din sa kanila na magtapos ng kanilang pag-aaral.

Palalagyan din umano niya ng maganda at maayos na landscape, bicycle lane, ilaw at mga pasilidad na tiyak na magiging dagdag atraksyon at ikasisiya ng mga Sorsoganong mahihilig mamasyal sa City Hall complex lalo na sa gabi at kung maganda ang panahon. Maging ang mga turistang dadayo dito ay tiyak din umanong maaakit sa mga bagong makikita sa parke.

Sa kasalukuyan ay dinarayo na ang parke ng mga taong nais mamasyal sa umaga man o maging sa gabi, yaong mga nais mag-ehersisyo at maging yaong nais lamang maglakad-lakad sa may malawak na espasyo at mahanging lugar.

Samantala, tiniyak naman ng Sorsogon City Police na ipinatutupad nila ang ibayong pagbabantay sa lugar upang matiyak na ligtas na makapamasyal ang publiko lalo na ng mga bata sa lugar.

Sa kasalukuyan ay wala umanong naitatalang anumang mga insidenteng nakasisira sa kapayapaan at kaayusan sa Sorsogon City Park kung kaya’t nananatiling ligtas mamasyal ang publiko dito. (BARecebido, PIA Sorsogon)

No comments: