Panawagan ng Comelec: “Last Hour Attitude” ng mga Pilipino baguhin na

Ni: Bennie A. Recebido

LUNGSOD NG SORSOGON, Oktubre 31 (PIA) – Sa kabila ng dalawang taong panahong itinakda ng Comission on Elections (Comelec) para sa Continuing Voter’s Registration at Validation, dagsa pa rin ngayong huling araw sa tanggapan ng Comelec ang mga botanteng nais magparehistro para sa 2013 midterm elections.

Ayon kay Provincial Election Supervisor Atty. Calixto Aquino, Jr., ang nakagawiang “last hour attitude” at “manana habit” ng mga Pilipino ang nais na baguhin ngayon ng Comelec kung kaya’t determinado silang sundin ang itinakdang panahon ng voter’s registration at validation, at huwag nang magbigay pa ng anumang extension ito.

Aniya, isasara na ang pagtanggap ng mga botanteng magpaparehistro alas singko ng hapon mamaya. Sinabi ng opisyal na sa ipinalabas nilang guidelines, kung mahaba pa ang pila, alas tres ng hapon ay ililista ng assistant colemec supervisor ang pangalan ng mga magpaparehistro at tatawagin ito ng tatlong beses, sakaling wala sila sa loob ng tanggapan ng Comelec ay hindi na ito bibigyan pa ng pagkakataong makapagparehistro.

Kahit pa umano nakapagsumite na ito ng application form kung hindi siya dumaan sa biometrics registration ay hindi siya kunsideradong lehitimong botante sa 2013.

Ginagawa nila umano ang ganitong hakbang nang sa gayon ay madisiplina at matuto ang mga Pilipino na sumunod sa itinatakdang mga patakaran at maalis na ang mga kaugaliang hindi nakakatulong para sa maayos na operasyon ng mga tanggapan tulad ng Comelec. Mahaba na rin umano ang palugit na ibinigay ng Comelec para sa mga ito kung kaya’t wala na silang dahilan pa upang magreklamo.

Sa bahagi naman ng validation, sinabi niyang mas magandang ma-validate ng botante ang dati nitong voter’s registration, subalit nilinaw din niyang maaari pa ring makaboto ngayong 2013 elections ang botanteng hindi nakapagpa-validate, dapat lang umanong nakaboto ito ng dalawang magkasunod nitong nakaraang mga eleksyon, noong 2010 national election at Barangay at Sangguniang Kabataan election.

Samantala, sa pinakahuling tala ng Comelec Sorsogon Provincial Office noong Hunyo 2012, nasa 18,185 ang mga bagong botanteng nagparehistro, subalit ilang mga munisipyo ang hindi pa nakapagsusumite sa kanila ng mga datos ng bagong botante sa kani-kanilang mga lugar.

Noong 2010 election nasa 395,371 ang kabuuang bilang ng mga botante. 

Samantala, sa lungsod naman ng Sorsogon, sinabi ni City Election Supervisor Atty. Ryan Filgueras na 80,000 hanggang 85,000 ang inaasahan nilang bilang ng mga lehitimong botante ngayong 2013 midterm elections sa Sorsogon City.

Malaking tulong umano ang isinagawa nilang satellite registrations sa mga barangay upang maabot ang mga botanteng kwalipikadong magparehistro mapabilis ang pagproseso ng mga voter's registration. (BARecebido, PIA Sorsogon)