Pinuno at kawani ng pamahalaan puspusang pinatutulong ng Pangulong Aquino sa Climate Change Conciousness Week

SORSOGON CITY, Oktubre 29 (PIA) – Ipagdiriwang sa darating na Nobyembre 19-25, 2012 ang Climate Change Consciousness Week alinsunod sa Memorandum ng Pangulo No. 35 ngayong taon.

Kaugnay nito, puspusang pinatutulong ng Pangulong Benigno S. Aquino III ang lahat ng pinuno at mga kawani ng pamahalaan, kasama ang mga Korporasyong Pagmamay-ari at Kontrolado ng Pamahalaan (GOCCs) at mga lokal na pamahalaan (LGUs) dahilan sa gagawing isang linggong pagdiriwang.

Nakapaloob sa Memorandum Circular No. 35 (series 2012) na nilagdaan ni Kalihim Tagapagpaganap Paquito N. Ochoa, Jr. noong Agosto 14 ang mga tagubilin ng Pangulo.

Sa Proklamasyon Blg. 1667 (s. 2008) ay idineklara ang Nobyembre 19-25, 2008 at taun-taon pagkatapos bilang Global Warming and Climate Change Consciousness Week.

Hangarin ng Proklamasyon na maging masigasig ang lahat tungkol sa global warming at pagbabago ng klima sa tulong ng malawakan at puspusang pagkilos para mabatid ng madla ang malaking suliraning naturan.

Nais ng nabanggit na proklamasyon na “magtulung-tulong ang sambayanan, gayundin ang mga sektor na publiko at pribado sa paghanap ng lunas sa mga panganib na bunga ng pagbabago ng klima.”

Inatasan ng Pangulo ang Presidential Communications Operations Office (PCOO) at ang Public Information Agency (PIA) na tulungan ang media sa bagay na ito. (PIA Sorsogon)