ERE ng PCG titiyak sa kaligtasan ng paglalayag ng mga sasakyang RoRo

Ni: Bennie A. Recebido

LUNGSOD NG SORSOGON, Nobyembre 5 (PIA) – Upang matiyak ng Philippine Coast Guard (PCG) ang maayos at ligtas na byahe ng mga malalaking sasakyang pandagat hindi lamang sa panahong dagsa ang mga pasahero kundi maging sa regular na mga pagbyahe nito, sinimulan ng PCG Detachment ng Matnog ang pagsasagawa ng Emergency Readiness Evaluation (ERE) sa mga tauhan o crew ng Roll-on Roll-off (RoRo) Vessel na may byaheng Matnog, Sorsogon patungong Allen at Dapdap sa Northern Samar.

Sa panayam ng PIA kay SW1 Michelle E. Pantangan ng PCG Sorsogon Station, sinimulan ng Coast Guard Detachment Matnog ang pagsasailalim sa mga tauhan ng sasakyang RoRo kalagitnaan ng Oktubre ngayong taon at magpapatuloy pa umano ito hanggang sa matapos na nila ang siyam na mga barkong may rutang Matnog-Allen-Matnog at Matnog-Dapdap-Matnog.

Dalawa umano sa siyam na mga Roro vessel ang natapos na nilang isailalim sa ERE nitong Oktubre at ngayong tapos na ang pag-obserba ng Undas ay sisikapin nilang maisailalim na rin ang pitong natitira pang mga barko.

Aniya, lahat ng ‘man over board’ ng mga barkong RoRo mula sa may pinakamataas hanggang sa may pinakamababang ranggo ay dapat na sumailalim sa ERE kung saan natatasa dito ang kakayahan ng mga tauhan ng RoRo pagdating sa mga sumusunod: Abandonship, Fire in Port and at Sea, Collission at Port and at Sea, Emergency Steering at Man Overboard.

Mahalaga din umanong nakukuha ng mga barkong naglalayag ang mga feedback o saloobin ng mga pasahero ukol sa serbisyong ibinibigay ng nasasakyan nilang mga barko.

Sa pamamagitan ng ERE tinitiyak ng Philippine Coast Guard na maiiwasan ang anumang mga sakuna sa karagatan sanhi ng kapabayaan o di kaya’y pagkakaroon ng anumang hindi inaasahang pangyayari. (BARecebido, PIA Sorsogon)