Pribadong kumpanya, nagsagawa ng inspeksyon sa mga tangke ng LPG sa Sorsogon

Ni: FB Tumalad

Lungsod ng Sorsogon, Hunyo 7 (PIA) - Nagsagawa nitong unang araw ng Hunyo ang 30 tauhan ng Lugus Double Trading Services (LDTS) ng inspeksyon sa mga kabahayan sa ibat-ibang bahagi ng lungsod ng Sorsogon upang magbigay kaalaman, babala at mahahalagang tip sa publiko hinggil sa pagtukoy ng depektibong tangke ng Liquified Petroleum Gas partikular ang Solane LPG na nabibili sa mga tindahan.

Base sa ipinakitang resibo ni Reynaldo Gattoc tumatayong Safety Consultant ng LDTS, na nakabase sa Commonwealth Avenue Fair View Park Quezon City, ang kumpanya ay pinamumunuan ni James Colleta.

Sinabi pa ni Gattoc  na mananatili sila sa loob ng isang buwan sa bawat probinsya sa kabikulan  para lamang magsagawa ng pag-aaral hinggil sa mga depektibong tangke at sinabi nito kung paano malalaman ang standard at sub-standard  o mapanganib na tangke.

Ayon pa kay Gattoc ang mga tangke na pumasa sa pagsusuri ng ahensya ng Department of Trade and Industry (DTI) ay markado ng nakaukit na PNS 1992-2000, habang ang sub–standard naman na tangke o hindi pumasa sa tamang pagsusuri ng DTI-Standards ay may nakaukit na 1980-1991.

Pangalawa sa mapanganib na tangke na dapat malaman ng publiko kung may bakas at palatandaang hinati sa gitna o pinutol at muling idinugtong gamit ang acetylene.

Ang pangatlong palatandaan ay ang pagkalabog sa tangke. Sa oras umano kinalabog ng matigas na bagay ang tangke at tunog lata ito ay nangangahulugang manipis ang materyal na ginamit at mapanganib ito oras na mabutas sapagkat maari itong sumabog.

Sakaling makita umano ang mga palatandaan sa biniling tangke, pinapayuhan nila ang mga mamimili na huwag itong tatanggapin at agad papalitan upang makaiwas sa sunog. Ang kaunting leakage ay maari ding pagmulan ng pagsambulat nito.

Abiso din ni Gattoc na palitan ang clamp ng hose pagkalipas ng tatlong buwan dahil nagkakaroon ito ng kalawang na maaring daanan ng singaw at maaring pagmulan ng sunog at masamang epekto sa kalusugan ng tao. Habang ang hose naman ng LPG ay dapat pinapalitan sa tuwing ika-anim hanggang walong buwan dahilan sa synthetic ito at natutunaw ng hindi namamalayan ng mga kasambahay na kadalasang pinagmumulan ng malaking pagsabog.

Subalit ayon sa DTI Sorsogon, maaring nagsasagawa ng adbokasiya ang nasabing kumpanya at nilinaw nito na walang naganap na koordinasyon sa kanilang tanggapan ang naturang kumpanya.

Nagbabala ang DTI Sorsogon sa publiko na doblehin ang pag-iingat lalo sa pagpapapasok ng mga taong katulad nito sapagkat kadalasan aniya ay ganito ang modus operandi ng mga masasamang loob na umiikot sa Metro Manila at umaabot na rin ito sa kabikulan. (FB Tumalad, PIA Sorsogon)