Monday, April 30, 2012

World Press Freedom Day ipagdiriwang sa Mayo 3


Ni: Bennie A. Recebido

LUNGSOD NG SORSOGON, April 30 (PIA) – Kaugnay ng pagdiriwang ng World Press Freedom Day sa Huwebes, May 3, isang araw na aktibidad ang pangungunahan ng grupo ng mga lokal na mamamahayag sa Sorsogon.

Ayon kay Administrative Support at Adhoc Secretary Alice Lilian Lopez, alas sais ng umaga ay
 gagawin ang opening program sa Sorsogon Baywalk kung saan magpapalipad ng mga lobo at saranggolang may nakasulat na “World Press Freedom” bilang pagpukaw sa kamalayan ng publiko ukol sa kalayaan sa pamamahayag.

Isang Agahan ng Pagkakaisa o Solidarity Breakfast ang gagawin sa Kapihan ni Tya Tinay matapos ang gagawing aktibidad sa Sorsogon Baywalk.

Alas-otso ng umaga hanggang ala-una ng hapon ay magkakaroon ng Seminar kung saan tampok ang paksa ukol sa Libel at Media Ethics na gagawin sa Sorsogon National High School Function Hall.

Inaasahang magiging mga tagapagsalita sa gagawing seminar sina Atty Bart Rayco, regional coordinator ng National Union of People’s Lawyer’s-Bicol Coordinating Body at Judge Marie Louise Guan-Aragon, presiding judge ng Bulan Municipal Trial Court. Susundan ang bawat pagtalakay ng isang open forum upang higit pang malinawan ang ilang mga isyung may kaugnayan sa temang inilahad ng mga tagapagsalita.

Magtatapos ang selebrasyon at aktibidad sa isang palabas ukol sa mga naganap na pagpatay sa mga mamamahayag at candle-lighting ceremony sa Capitol Park.

Ayon kay Lopez, bukas din ang aktibidad para sa mga media relations officer at journalism students. Bawat kalahok ay makatatanggap ng setipiko ng pakikilahok at media kit.

Aniya, layunin din ng pagdiriwang sa Sorsogon na masimulan na ang pagkakaisa ng mga lokal na mamamahayag dito upang sa kalaunan, ay makabuo ng isang organisasyong tutugon sa panganagailangan at kapakanan ng mga nasa industriya ng media sa Sorsogon kasama na rin ang pagpapaigting pa ng kanilang propesyunal na kaalaman bilang media practitioner.

At sa pangunang aktibidad, ayon pa kay Lopez, ay muling magkakaroon ng isang seminar sa darating na ika-12 ng Mayo ngayong taon sa pangunguna nina Rowena Paraan, Secretary General ng National Union of Journalists of the Philippines at Bayan Muna Representative Teddy Casiño. Ang nasabing seminar ay tutuon sa Libel, Media Ethics, at Freedom of Information bill.

Pagsisikapan din umano ng bubuuing grupo na makapagsagawa ng data banking at profiling ng mga media sa Sorsogon upang matukoy at mapagsikapang matugunan ang mga pangangailangang makikita dito. (BARecebido, PIA Sorsogon)

No comments: