BFP Sorsogon inilatag ang kanilang 5-yr Development Plan

Ni: Bennie A. Recebido

LUNGSOD NG SORSOGON, May 3 (PIA) – Upang mapataas pa ang antas ng serbisyong ibinibigay ng Bureau of Fire Protection (BFP), inilatag ni Provincial Fire Marshal CInsp Achilles Santiago ang ilang mga pag-aaral at suhestyon upang matugunan ito sa ilalim ng kanilang 5-yr (2012-2016) Development Plan.

Aniya, kabilang sa mga dapat pagtuunang-pansin ay ang personnel, financial at operational resources, water sources at support groups.

Ayon kay Santiago, sa bahagi ng kanilang personnel resources, nais ng kanilang tanggapan na makamit ang tamang bilang ng mga bumberong makatutugon sa pangangailangan ng populasyon ng lalawigan. Aniya, sa kasalukuyan, ang isang bumbero ay may 2,000 populasyong dapat bantayan at respondehan.

Sa Sorsogon, 133 na mga tauhan ng BFP ang sa ngayon ay nakakalat sa iba’t-ibang mga fire station at aabot pa umano sa 197 na bilang ng tauhan ang kailangan upang maging ideal para sa “one (1) fireman is to 2,000 population ratio” at maibigay ang “hundred percent excellent performance” ng BFP.

Dapat din umanong mapataas ang antas ng educational criterion ng BFP bilang tugon sa R.A. 9592 sa pamamagitan ng pagpapaigting ng pakikipag-ugnayan sa mga paaralang nagbibigay ng Expanded Accreditation Tertiary Educational Programme, at sa pamamagitan ng paghikayat sa mga tauhan ng BFP na samantalahin ang mga local scholarship program ng mga ahensya ng pamahalaan at non-government organization.

Dagdag pa niyang dapat na pataasin ang kasanayan at kaalaman ng mga bumbero sa pamamagitan ng pagsasailalim sa mga mandatory exercises at espesyal na mga kursong ibinibigay ng Fire National Training Institute.

Sa panig ng operational resources, pinagsisikapan umano nilang maayos at makumpleto ang kanilang mga fire suppression tool, pagtatatag ng fire suppression team, pag-aayos ng mga fire station, pagkakaroon ng kaukulang bilang ng fire truck at ambulance, pagkakaroon ng kahit man lang isang yunit ng base radio at dalawang handheld radio sa bawat fire truck at dalawang self-contained breathing apparatus. Sa Sorsogon, pitong firetruck na kumpleto sa kagamitan ang kailangan pa upang maserbisyuhan nang maayos ang kasalukuyang populasyon ng lalawigan.

Ayon pa kay Santiago dapat ding maisa-alang-alang ang tamang budget para sa BFP upang matugunan ang administrative at operational activitiy ng mga fire stations. Kabilang na umano dito ang office supplies, preventive maintenance, petrolyo at computer equipment.

Sinabi pa ni Santiago na napakahalaga rin na madagdagan ang mga water source tulad ng fire hydrant sa lungsod at sa labing-apat na munisipyo dito sa pakikipag-ugnayan sa local water district at ipinanawagan din nito ang tamang pangangalaga sa mga likas na yamang nagbibigay ng natural na suplay ng tubig tulad ng ilog at mga sapa.

Binigyang-diin din niya na mahalaga ang suporta mula sa iba’t-ibang mga ahensya at grupo sa pamamagitan ng pagtatasa at pagrerebisa ng mga Memorandum of Agreement (MOAs) at pagtatatag ng mga Community-Based Fire Protection Programme sa mga paaralan at opisyal sa barangay at maging sa mga NGO sa pamamagitan naman ng pagbubuo ng mga Community Volunteer Fire Brigade. (BARecebido, PIA Sorsogon)