Kampanya laban sa human trafficking pinaiigting

Ni: Bennie A. Recebido

LALAWIGAN NG SORSOGON, May 8 (PIA) – Patuloy na pinag-iingat ng mga awtoridad dito hindi lamang ang mga kababaihan kundi maging ang mga kalalakihan na rin lalo na ang mga menor de edad at maging ang mga magulang nito nang sa ganon ay hindi sila mabiktima ng anumang pang-aabuso kabilang na ang panganagalakal sa tao o human trafficking.

Hinikayat din nito ang komunidad na makiisa sa kanilang kampanya laban sa human trafficking sa pamamagitan ng pagiging mapagmatayag sa kanilang kapaligiran at sa mga istrangherong nakikita nila sa kanilang lugar.

Matatandaang nito lamang buwan ng Abril, labingsiyam kataong mga menor de edad ang mabibiktima sana ng human trafficking ang nailigtas ng Criminal Investigation and Detection Group (CIDG) sa pangunguna ni PInsp Ricardo Ong at ng Police Intelligence Service ng Sorsogon Police Provincial Office mula sa pagkakapariwara sa pantalan ng Matnog.

Sa naging pahayag ni Ong, sa labingsiyam kataong narekrut mula sa Leyte at ibabyahe sana papunta sa Maynila, anim ay kababaihan at isa ang lalaki na pawang menor de edad, habang mayroong iba pang kababaihang nasa hustong gulang na.

Lahat umano ng mga biktima ay pawang pinangakuan ng magagandang trabaho sa Metro Manila.

Ayon kay Ong, agad din naman nilang naaresto ang apat na suspetsado at nasampahan ng paglabag sa Anti-Human Trafficking in Persons Act.

Ang human trafficking ay isang makabagong anyo ng karahasan, pang-aalipin, pang-aabuso at krimen laban sa tao kabilang na ang sapilitang prostitusyon, sex trafficking at child labor.

Sa ilalim ng Sec.6 (a) at Sec. 6 (c) ng Republic Act 9208, may kaparusahan ang sinumang mapapatunayang lumabag dito tulad ng pagkakabilanggo ng 20 taon o habangbuhay at penalidad na hindi bababa sa P1,000,000 hanggang P5,000.000.

Sa lalawigan ng Sorsogon, ang mga naisasalbang biktima ng human trafficking ay temporaryo at libreng inilalagak sa “Bahay Silungan sa Daungan” sa loob ng anim na buwan hanggang sa maibalik ang mga biktima sa kani-kanilang mga pamilya.

Ang “Bahay Silungan sa Daungan” ay pinamamahalaan ng Visayan Forum Foundation Inc. (VF), isang non-government organization na nangangalaga sa kapakanan ng mga domestic worker at biktima ng sekswal na pangangalakal.

Mayroon ding kahalintulad na halfway house sa iba’t-ibang lugar sa bansa tulad ng Manila International Airport, North Harbor sa Manila, Pandaigdigang Daungan sa Batangas at sa pantalan ng Sasa sa Davao. Ang mga half-way house na ito ay naitayo sa pamamagitan ng rekurso ng Philippine Ports Authority.

Ayon sa pag-aaral, ang mga sumusunod ang kadahilanan kung bakit may mga nabibiktima ng human trafficking: kahirapan, negosyo ng pagbebenta ng mga tao, kakulangan sa edukasyon at impormasyon, internet at modernong teknolohiya at magulong sitwasyon ng pamilya.

Ilan sa mga tip upang maiwasan ang pagiging biktima ng human trafficking ay ang mga sumusunod: Dagdagan ang kaalaman tungkol sa trafficking, makilahok sa mga pulong sa barangay, sikaping mapanatiling mapayapa at puno ng pagmamahalan ang tahanan, maging alerto at mapagmasid, huwag basta-basta maniniwala sa mga pangako lalo na ng mga istranghero, alamin ang mga karapatan at batas, at higit sa lahat maging responsible.

Dapat na i-report ang mga kaso ng trafficking sa barangay, pulisya, DSWD o tumawag sa Action Line (02) 1343 sa mga probinsya. (MLHatoc/BARecebido, PIA Sorsogon)