Opisyal sa kalusugan nanawagan sa mga buntis na magpasuri sa doktor bago manganak

Ni: Bennie A. Recebido

LUNGSOD NG SORSOGON, May 7 (PIA) – Pumapangalawa ang probinsya ng Sorsogon sa buong rehiyon ng Bikol sa may pinakamataas na bilang ng mga namamatay sa panganganak dala ng kumplikasyon at kakulangan sa tamang pangangalaga ng mga ina sa kanilang kalusugan habang nagbubuntis.

Isa sa mga kumplikasyon ay ang pagkakaubos ng dugo ng isang nanganganak na kadalasang nangyayari sa mga inang hindi dumaan sa kaukulang pagsusuri habang nasa sinapupunan pa nila ang kanilang anak.

Ito ang sinabi ni Janette Diesta, Project Coordinator ng Womens Health on Safe Motherhood Project sa programa ng Provincial Health Office, ang “Abiso ng PHO”.

Kaugnay nito ay nagsagawa ng agarang aksyon ang Department of Health (DOH) at PHO upang mabigyan ng mabilisang solusyon ang banta ng wala sa oras na pagkamatay ng mga nanganganak na ina at ng bagong silang na mga sanggol.

Kabilang na dito ang pagsagawa ng mga pagsasanay sa mga kumadrona at mga health workers upang magabayan ang mga nagbubuntis sa mga dapat nilang gawin.  

Ang mga hilot naman ay isinasailalim sa oryentasyon ukol sa tamang hakbang sa pagpapaanak at mga kasong maaring isampa sa kanila sakaling mapatunayang may paglabag sa ginawa nilang pagpapaanak sa loob ng bahay.

Dagdag pa ni Diesta na mahalagang nagpapasuri sa doktor ang mga buntis upang mapanatiling malusog ang bata habang nasa sinapupunan pa ito at maiwasan ang pagkakalaglag ng kanilang mga sanggol.

Matatandaang noong taong 2006 ay naitala din ang probinsya ng Sorsogon sa may napakataas na bilang ng namamatay na ina at bata dahilan sa kawalan ng maganda at kakulangan ng pasilidad sa panganganak.

Inaasahang sa pamamagitan ng agresibong aksyon at kampanya ng DOH Provincial Health Team at ng PHO, at sa pagtaas ng bilang ng mga birthing facilities o lying-in clinic sa lalawigan ay unti-unti nang mawawala sa listahan ng ‘high maternal and child mortality’ ang Sorsogon.

Katumbas na rin umano ng pangananak sa ospital ang panganganak sa mga birthing facilities sapagkat mayroon din itong mga sinanay na kumadrona at kumpleto rin ito sa mga pasilidad sa panganganak.

Sa Pilipinas, sampu hanggang labing-dalawang mga ina ang namamatay bawat araw dahilan sa kumplikasyon sa panganganak, subalit patuloy pa rin ang pagpupunyagi ng pamahalaan na kung di man maabot ang pangako nitong matugunan ang Millennium Development Goal No. 5, ay mabawasan man lang ang bilang na namamatay na ina hanggang sa 2015. (BARecebido, PIA Sorsogon)