Ni: FB Tumalad
LUNGSOD NG SORSOGON, Disyembre 6 (PIA) –Nagsagawa
ng inspeksyon sa lahat ng mga maliliit at malalaking tindahan ng mga paputok
ang mga kagawad ng Bureau of Fire Protection (BFP) Sorsogon City noong Lunes
Disyembre 3, 2012 sa syudad ng Sorsogon.
Martes, Disyembre 4 ay muli silang
nagpatuloy ng inspeksyon upang tumutok naman sa mga tindahan ng Christmas lights
upang siguruhing pumasa ang mga ito sa Department of Trade and industry (DTI)
standard at markado ito ng Import Commodity Clearance (ICC) stickers na ibig
sabihin ang mga produktong ito ay ligtas gamitin ng publiko.
Ang inspeksyon ay alinsunod sa alituntunin
ng Republic Act 9514 o mas kilala bilang Fire Code of the Philippines of 2008.
Ayon kay BFP Sorsogon City Fire Marshal
Senior Inspector Walter B. Marcial, ang pagsasagawa nila ng malawakang
inspeksyon sa mga istablisimyentong nangangalakal at gumagawa ng mga paputok at
Christmas lights ay bilang pagsunod sa istriktong alituntunin ng batas at
masiguro ang kaligtasan ng mamamayan.
Isa sa mga kinokunsidera ng BFP ang
lomolobong bilang ng sunog at aksidente sa panahon ng kapaskuhan at bagong taon
na karamihang dahilan ay ang paggamit ng mga paputok, pyro techniques at
sub-standard na Christmas lights at palamuti.
Mahigpit na ipinapatupad ng ahensya ang
sistema na ibig sabihin ay walang maaring magbenta mamahagi at gumawa ng mga
paputok at Christmas lights ng walang Fire Safety Inspection Certificate (FSIC)
mula sa kanilang tanggapan.
Sa ngayon ay patuloy an nakikipag-ugnayan
ang BFP sa ibat-ibang ahensya ng gobyerno upang lubos na maipaunawa ang layunin
ng kanilang hakbang kung saan nakatuon ito sa kaligtasan ng publiko at maiwasan
ang hindi inaasahang mga pangyayari sa panahon ng selebrasyon ng kapaskuhan.
Panawagan pa rin ng BFP sa publiko na salubungin
ng ligtas at mapayapa ang pasko at bagong taon at maging maingat at mapagmatyag
sa pagpili ng mga binibiling dekorasyon at pailaw sa kanilang mga tahanan para
makaiwas sa banta ng sunog.(FB Tumalad,PIA Sorsogon)
No comments:
Post a Comment