Publiko dapat na sundin ang “Oplan Paalala” ng BFP

LUNGSOD NG SORSOGON, Disyembre 10 – Sa nalalapit na pagdiriwang ng Pasko at ng Bagong taon, muli na namang pinaiigting ng Bureau of Fire Protection (BFP) ang kanilang paalala sa publiko ukol sa ibayong pag-iingat upang maiwasan ang anumang peligrong maaaring magdala ng sunog at iba pang mga pangyayaring kaugnay nito.

Ayon kay BFP Sorsogon City Fire Marshal SInsp Walter Marcial, likas na sa mga Sorsoganon o sa mga Pilipino sa kabuuan na ipagdiwang ang panahon ng kapaskuhan at salubungin ang Bagong taon na maliwanang, maingay at makulay subalit dapat umanong maging maingat nang sa gayon ay di malagay sa panganib ang buhay at maging mga ari-arian habang nagkakasiyahan at nagdiriwang ng okasyon.

Kung kaya’t bilang paghahanda umano sa darating na okasyon, pinaiigting ngayon ng BFP Sorsogon City ang “Oplan Paalala Advocacy 2012” sa pamamagitan ng iba’t-ibang mga aktibidad na magpapalalim pa sa kaalaman ng publiko ukol sa mga hakbang pangkaligtasan laban sa sunog.

Ayon sa opisyal, sinimulan na nila noong Disyembre uno na magtatagal hanggang sa Disyembre 15 ang Fire Safety Evaluation/ Assessment/ Inspection sa mga establisimyento sa lungsod na nagbebenta, namamahagi at gumagawa ng mga paputok at kwitis at maging yaong nagbebenta ng mga Christmas lights upang matiyak na nakapasa ito sa istandard ng Deparftment of Trade and Industry (DTI) at mayrooong tatak ng Import Commodity Clearance (ICC).

Mayroon na din umano silang ginagawang koordinasyon sa mga Local Government Unit (LGU), Business Permit and Licenses Office (BPLO), Philippine National Police (PNP), Disaster Risk Reduction Management Council (DRRMC) at iba pang mga ahensya ng pamahalaan kaugnay ng pagbebenta ng mga paputok at kwitis upang maiwasan ang mga ilegal na operator at tagagawa ng mga produktong ito.

Maliban dito ay ipatutupad din simula sa Disyembre 16 hanggang sa Enero 2, 2013 ang “Oplan Paalala” at “Oplan Iwas Paputok”, “Aksyon Paputok Injury Reduction” (APIR) at “Ugnayan sa Mamamayan” Advocacy Campaign.

Mula naman Disyembre 23, 2012 hanggang Enero 2, 2013 ay isasailalim sa Heightened Alert Status ang mga awtoridad habang mula Disyembre 24 hanggang Disyembre 31 ay magsasagawa naman sila ng mga pag-iikot upang pukawin ang kamalayan ng publiko at paalalahan ito ukol sa mga hakbang pangkaligtasan laban sa sunog. Magkakaron din umano sila ng feeding activity sa ilang mga piling lugar sa lungsod sa panahong ito.

Dagdag pa niya na magkakaroon din sila ng libreng blood pressure monitoring. Maglalagay din sila ng mga tauhan ng BFP sa mga malalaking tindahan sa lungsod upang matiyak na ligtas na nakakapamili ang mga kunsumidor sa panahon ng Christmas sale at “last hour shopping”. Makikita din umano ang mga fire truck sa mga pampublikong lugar at handa sakaling magkaroon ng sunog.

Pinayuhan din ni Marcial ang publiko na sakaling magkaroon ng sunog o aksidente, agad na makipag-ugnayan sa kanilang tanggapan sa numerong (056) 421-6320 o sa (056) 211-7996 o sa cellphone number 09072927215 o sa kanilang hotline 160. (BARecebido, PIA Sorsogon/MCECorral, BFP)