Pagbabawal sa mga nagtitinda sa paligid ng paaralan tinututukan

Ni: Bennie A. Recebido

LUNGSOD NG SORSOGON, Hulyo 13 (PIA) – Nanawagan ang pamunuan ng Sorsogon City Schools Division sa mga mag-aaral na kung maaari ay iwasan na ang pagtangkilik sa mga tindahan ng junk foods at pagbili ng mga laruan sa mga sidewalk vendors.

Sa Reaching Out Program ng DepEd sinabi ni Sorsogon City Schools Division Special Education Supervisor Rose Caguia na isa sa mga suliraning kinakaharap ngayon hindi lamang ng mga guro at opisyal ng mga paaralan kundi maging ng mga magulang ng mag-aaral ang mga nagtitinda sa mga paligid ng paaralan ng pagkain, inumin at laruan na kung minsan ay nagiging ugat ng pagkakasakit o di naman kaya’y nagiging sanhi upang maaksidente ang mga mag-aaral kapag  rush hour dahilan sa pag-uunahan nitong makabili o di kaya’y sa pagsisikip ng mga daanan.

Ayon kay Caguia, makailang-ulit na nilang sinita ang mga nagtitinda, subalit pabalik-balik pa rin ito kung kaya’t higit umanong tututukan nila ngayon ang pagpapa-alis sa mga ito.

Sinabi din niyang paiigtingin nila ang information campaign sa mga mag-aaral at kung hindi umano tatangkilikin ng mga mag-aaral ang mga ibinebenta ng mga nagtitindang ito sa paligid ng mga paaralan ay tiyak na magsasawa ito at kusa na ring aalis.

Samantala, hinikayat din ng opisyal ang mga kantina sa mga paaralan na gawing kaakit-akit sa mga mag-aaral ang paligid ng kantina at ang mga ibinebenta dito nang sa gayon ay mabaling ang atensyon ng mga bata at dito na ito bumili ng kanilang pagkain at inumin.

Dapat din umanong panatilihin ang kalinisan ng mga kantina, isa-alang-alang ang tamang paghahanda ng pagkain at maayos na kalusugan ng mga personaheng nagmamantini nito. Nag-abiso din si Caguia sa mga kantina na dapat na palagiang bagong luto ang mga ibinebentang pagkain upang makaiwas sa food poisoning.

Sa ngayon ay aktibo ang Deped sa pagpapaigting ng kampanya ukol sa tamang nutrisyon at kalinisan lalo’t ipinagdiriwang ngayong Hulyo ang Buwan ng Nutrisyon sa ilalim ng temang: “Pagkain ng Gulay Ugaliin, Araw-araw Itong Ihain”. (BARecebido/FBTumalad, PIA Sorsogon)