GUBAT NATIONAL HIGH SCHOOL TEAM PANALO SA FINAL SHOWCASE NG PROJECT CITIZEN

Tagalog News Release

SORSOGON PROVINCE (March 17) – Muling napatunayan ang galing ng mga mag-aaral mula sa Gubat National high School matapos na makuha nito ang unang pwesto sa ginanap na Final Showcase ng Project Citizen: promoting democratic values in the province of Sorsogon.

Ang project citizen ng Gubat National High School at tumutok sa kagustuhan ng mga mag-aaral na mailigtas ang unti-unti nang namamatay na industriya sa pagpapalayok ng Brgy. Paradijon sa bayan ng Gubat.

Ayon kay Provincial Executive Assistant for Education Dr. Librada Esplana mula sa dalawampung mga pampublikong paaralan sa lalawigan, pumili ng limang project citizen finalist kung saan nakabilang ang Barcelona National Comprehensive High School sa bayan ng Barcelona na nagnanais na mabawi ang legasiya ng Barcelona Park at maisama sa mga deklaradong historical site ng National Historical Institute.

Napabilang din ang Beguin National High School sa bayan ng Gubat na tinutukan ang malawakang illegal logging sa Brgy. Monte Calvario sa Bulan at ang killer landslide sa Magallanes na nag-ugat din sa illegal logging.

Tinutukan naman ng project Citizen ng Alcoba National high School sa Bulan ang Effective Solid Waste Management at pagmamahal sa kalikasan habang ang Matnog National High School ay tinutukan naman ang peligro sa kalusugan at buhay ng mga Batang Sisid Barya sa bayan ng Matnog.

Ang project Citizen ay isang research-based project para sa mga kabataan na tinutulungan ng Spanish Government. Sinasanay nito ang mga mag-aaral sa larangan ng policy development at art of lobbying sa pamamagitan ng mga workshop at exposures.

Mula sa mga natutunan nila maaari nang sila mismo ang gumawa ng policy advocacy o di kaya’y alternatibong solusyon na maipiprisinta nila sa kanilang barangay officials.

Ayon pa kay Esplana sa pamamagitan ng Project Citizen ay napupukaw ang kamalayan ng mga mag-aaral at kabataan sa mga isyu at suliranin sa kani-kanilang mga barangay dahilan upang
maging well-informed citizens at maging matuwid ang mga ito sa hinaharap. (Bennie A. Recebido, PIA Sorsogon)

Tagalog News Release

SORSOGON PROVINCE (March 16) –Bumaba ng halos ay limampung bahagdan ang suplay ng tubig ngayon sa lalawigan kung ihahambing noong nakaraang taon.

Ito ang ipinahayag ni National Irrigation Administration Provincial Officer In-Charge Servio Manlangit. Aniya, dahilan sa nararanasang El Niño ngayon, bumaba ng 50% ang suplay ng tubig sa lalawigan kumpara noong 2009.

Subalit sinabi nito na sa pamamagitan ng pagtutulungan ng bawat isa sa pagtitipid sa paggamit ng tubig, tiyak na hindi pa rin magkukulang ang kailangang suplay ng mga mamamayan.

Tiniyak din niya sa mga residente ng Sorsogon na patuloy din ang ginagawang programa ng NIA para sa mga magsasaka kabilang na dito ang pagpapaayos ng mga dam, communal irrigation system at shallow tube well na nakakatulong para mabawasan ang suliraning kinakaharap ng mga magsasaka dito.

Samantala, umapela naman ang Department of Environment and Natural Resources sa mga lokal na residente na magkaisa at magtulungan sa patuloy na pangangalaga at proteksyon ng kalikasan.

Ayon kay PENRO Oscar Dominguez, kahit na nakakaranas pa ng mga pag-uulan dito sa lalawigan ay hindi rin dapat na maging pabaya ang bawat isa ukol sa paglaban sa nararanasang global warming. (Bennie A. Recebido, PIA Sorsogon)