Bahay ng PDEA agent sa Sorsogon pinagbabaril

LUNGSOD NG SORSOGON, Setyembre 5 (PIA) – Isang insidente ng grabeng pananakot ang naitala sa isang ahente ng Phiippine Drug Enforcement Agency (PDEA) na si IOI Arnel Estrellado kahapon.

Ayon sa ulat na ipinadala ng City Police Station, alas sais ng umaga kahapon nang humingi sa kanila ng tulong si Estrellado na magsagawa ng ocular inspection sa kanyang residensya matapos na pagbabarilin ang kanyang bahay ng di nakilalang mga nakahelmet na suspek sakay ng motorsiklo.

Nakuha ang mga basyo ng bala mula sa kalibre 45 baril na nagkalat sa kanilang compound na hinihinalang gamit ng mga suspek.

Sa inisyal na imbestigasyon, bago ang insidente, alas dos ng madaling araw nang gisingin siya ng kanyang asawa upang ipaalam sa kanya na nakarinig siya ng alingawngaw ng putok ng baril.

Alas singko ng umaga ay nakatanggap ng text message si IOI Estrellado mula sa kanyang impormante na nagsasabing “sinampulan ang bahay mo”.

Ayon kay Estrellado, hindi siya natatakot at bahagi na rin umano ito ng kanilang trabaho at natural ang ganitong mga pangyayari lalo pa’t higit nilang pinaigting ang kanilang kampanya laban sa droga, at maaaring may nasasagasaan silang mga elementong apektado ang operasyon sa droga. (BARecebido, PIA-5/Sorsogon)

Kaso ng pamamaril sa isang retiradong pulis naitala sa Sorsogon City

LUNGSOD NG SORSOGON, Setyembre 5 (PIA) – Ikinalungkot ng mga kasapi ng pulisya sa Sorsogon City ang sinapit ng kakaretiro pa lamang na si PO3 Jungil Dichoso Escalante, 45 taong gulang, may asawa at residente ng Brgy. Pangpang, Sorsogon City.

Ayon kay Sorsogon Police Provincial Office OIC Provincial Director Ramon S. Ranara, agad niyang inalerto ang mga kapulisan hindi lamang sa lungsod ng Sorsogon kundi sa buong lalawigan para sa agarang pagkahuli ng mga suspek at upang maiwasang maulit din ang kahalintulad na insidente.

Sanib pwersa din umano ang Sorsogon City Police Station Intel Operatives, SWAT Team, tauhan ng CPAC2 at MPU sa pagtugis sa mga suspek.

Binaril kahapon ng di nakilalang mga suspek si Escalante sa Ballesteros St. Purok 8, Brgy. Sampaloc, Sorsogon City. Nakasuot ang tatlong mga kalalakihan ng puti at itim na t-shirt at short pants, may edad na humigit kumulang 25 taon, may taas na humigit kumulang 5’4” hanggang 5’5” at may maliit lamang na pangangatawan.

Ayon sa isang saksi, bago ang insidente ay nakita niya ang biktima na may kausap sa kanyang cellphone sa labas ng bahay nito. Bigla na lamang umanong lumapit ang mga suspek na armado ng handgun at agad na binaril ang biktima sa dibdib at ulo na naging sanhi ng agaran nitong pagkamatay.

Ayon pa sa ulat, kinuha pa ng mga suspek ang kalibre 45 baril nito at mismong ang Honda Wave na motorsiklo pa ni Escalante ang ginamit ng mga suspek sa kanilang pagtakas.

Agad namang rumisponde sa pinagyarihan ng krimen ang mga tauhan ng CPAC2 at ang Scene of the Crimes Operatives (SOCO) kung saan naekober nito ang apat na gamit nang lalagyan ng bala ng kalibre 45 baril at dalawang basyo ng bala.

Samantala, inamin naman ng Bagong Hukbong Bayan Celso Minguez Command BHB CMC) ang pamamaril-patay kay Escalante kung saan binibigyan lamang umano nila ng hustisya ang pagkakapatay noon kay Ricardo “Ding” Uy, ang dating chapter president ng Bayan Muna. Sabit din umano si Escalante sa bentahan ng droga sa Sorsogon City.

Sa ipinalabas na press statement ng BHB CMC, sinabi ng tagapagsalita nitong si Ka Samuel Guerrero na nais nilang linawin sa publiko na sila ang responsable sa insidente at maalis ang spekulasyon ng publiko at maiwasang maibintang pa sa ibang tao ang pamamaril. (BARecebido, PIA-5/Sorsogon)

Kampanyang “Bawal ang Epal Dito” tampok sa Dayalogo ng DSWD at Liga ng mga Barangay

Ni: Bennie A. Recebido

SORSOGON CITY, September 4 (PIA) – Kaugnay ng nalalapit na halalan sa Barangay ngayong Oktubre, nais ng Department of Social Welfare and Development (DSWD) na maprotektahan at huwag maabuso ang karapatan ng mga benepisyaryo ng Pantawid Pamilyang Pilipino Program o mas kilala bilang 4Ps na makalahok sa isang malaya at tapat na eleksyon.

Ayon kay DSWD Bicol Regional Director Arnel B. Garcia, masigasig ang kanilang departamento na mabigyang proteksyon ang mga kasapi ng 4Ps upang makalahok sa isang malaya at tapat na halalan ngayong Oktubre habang pinoprotektahan din ang integridad ng programa kasama na ang kaligtasan at soberenya ng mga nagpapatupad ng 4Ps, kung kaya’t pinaiigting nila ang kampanya ng “Bawal ang Epal Dito” (BAED).

Kaugnay nito, magsasagawa bukas, Setyembre 5, 2013, ng Provincial BAED Orientation cum Dialogue sa mga chapter president ng Liga ng mga Barangay ang DSWD sa lungsod ng Sorsogon.

Matatandaang una nang inilunsad sa lalawigan ng Sorsogon ang “Bawal ang Epal Dito” Campaign noong nakaraang Abril ngayong taon upang walisin ang mga “epal” na ginagamit ang mga programang ipinatutupad ng pamahalaan partikular ang Pantawid Pamilyang Pilipino Program.

Ito ay alinsunod na rin sa Memorandum Circular No. 24 ng DSWD na ipinalabas noong ika-7 ng Enero, 2013 na naglalaman ng mga patakaran at aktibidad na dapat sundin sa pagpapatupad ng programa sa panahon ng national at local election.

Umaasa ang DSWD at ang mga tagapagpatupad ng 4Ps na hindi magagamit ng mga “epal” ang programa para sa mga pansariling interes ngayong darating na halalan sa barangay.

Nanawagan din Dir. Garcia sa mga benepisyaryo ng 4Ps na alamin ang kanilang mga karapatan bilang benepisyaryo at botante, at maging mapagbantay upang hindi rin sila maabuso ng mga “epal”. (BARecebido, PIA Sorsogon)

LPCCAC nagsasagawa ng oryentasyon sa mga bagong alkalde sa mga munisipyo

Ni: Bennie A. Recebido

LUNGSOD NG SORSOGON, Styembre 4 (PIA) – Sa patuloy na pagpapaigting pa ng kaalaman sa pagpapatupad ng Batas 7581 o mas kilala bilang Price Act of 1992, nag-iikot ngayon ang Local Price Coordinating and Consumer Affairs Council (LPCCAC) sa mga munisipyo na may bagong halal na alkalde upang bigyang oryentasyon ang mga ito ukol sa nasabing batas.

Ang batas na ito ang nagbibigay proteksyon sa mga kunsumidor sa pamamagitan ng pagmamantini ng sa halaga ng mga pangangailangan at pangunahing bilihin. Ito rin ang nagtatakda ng mga hakbang laban sa hindi makatarungang pagtaas ng halaga ng mga bilihin sa panahong may emerhensya o kalamidad.

Ayon kay Department of Trade and Industry (DTI) Sorsogon Provincial Director Leah Pagao, kaugnay ng pagpapaigting pa ng kaalaman ng mga tagapagpatupad sa lokal na pamahalaan ng batas na ito, minabuti ng LPCCAC ng Sorsogon na ikutin ang mga munisipalidad at lungsod na mayroong bagong upong alkalde upang bigyan ng oryentasyon ang mga ito ukol sa mahahalagang puntos na nakapaloob sa Price Act at maipakilala na rin ang mga kasapi ng LPCCAC at kung ano ang papel na ginagampanan nito.

Ang DTI ang siyang tumatayong secretariat ng LPCCAC.

Kabilang sa mga lugar sa lalawigan na may bagong alkalde ay ang munisipyo ng Gubat, Bulan, Bulusan, Magallanes, Donsol, Juban, Prieto Diaz at ang Sorsogon City.

Matatandaang una nang binisita ng grupo ang bayan ng Gubat noong Huwebes, Agosto 29, 2013 kung saan alkalde dito si Hon. Roderick Co. Nakatakda namang bisitahin ng LPCCAC ngayong araw ang bayan ng Bulusan na pinamumunuan ni Mayor Domingo Halum.

Ayon pa kay Director Pagao, nahahati ang pagbisita sa dalawang bahagi, una ay ang pagbibigay oryentasyon sa punong ehekutibo, Sangguniang Bayan Chair on Trade and Industry, at mga tagapagpatupad sa munisipyo, habang sa hapon naman ay ipatutupad ng grupo ang nasabing batas.

Inaasahang matatapos ang pag-iikot sa walong LGU bago matapos ang Nobyembre ngayong taon. (BARecebido, PIA-5/Sorsogon)