Vehicular accident sa Matnog, nagtala ng anim na patay, mahigit 30 sugatan

Tagalog News Release

Sorsogon City, March 11, (PIA) - Isang vehicular accident ang naganap kanina, bandang alas dose y medya ng madaling araw sa Brgy. Pawa sa bayan ng Matnog, Sorsogon kung saan sangkot dito ang PP Bus Line at Eagle Star Bus.

Sa inisyal na ulat na ipinaabot ni Matnog PNP Chief PSInsp Jeffrey Cereno, nag-overtake ang Eagle Star Bus galing ng Maynila sa isang Philtranco Bus nang aksidenteng mabangga nito ang PP Bus na papalabas ng Matnog, Sorsogon.

Ayon pa kay Cereno, umiwas ang PP Bus kung kaya’t ang katawan nito ang natamaan na nagresulta sa pagkamatay ng apat katao sa mismong lugar ng pinagyarihan at pagkakasugat ng mahigit-kumulang sa tatlumpong katao.

Ang Eagle Star Bus na may plakang UVJ 273 ay minamaneho ni Rolito Calungsod ng Silago, Leyte habang ang PP Bus na may plakang PYP687 ay minamaneho naman ni Ronnie Sulutan Olaman, Jr.

Karamihan diumano sa mga biktima ay mga taga-Leyte at inaalam pa ng mga awtoridad kung may taga-Sorsogon na namatay.

“Sa ngayon, masusing imbestigasyon ang aming ginagawa upang makuha ang kumpletong detalye bago namin tuluyang ipalabas ang pinal na mga mga pangalan ng biktima,” pahayag pa ni Cereno.

Ang ilan sa mga sugatan ay dinala sa Bico Regional Teaching and training Hospital (BRTTH) sa Albay, habang ang iba pa ay dinala naman sa Sorsogon Provincial Hospital.

Samantala, sa record naman ng Sorsogon Provincial Hospital, sa labinlimang mga sugatang isinugod sa kanila, dalawa pa ang kinumpirma nilang Dead on Arrival sa kanilang ospital bandang ala-una ng umaga kanina. Ito ay maliban pa sa apat na namatay sa mismong lugar na pinagyarihan ng insidente, kung kaya’t sa kabuuan ay anim na ang patay sanhi ng vehicular accident na ito.

Pito dito ang dinala na kagabi pa sa BRTTH habang ang natitira pa ay patuloy pa ring ginagamot hanggang sa kasalukuyan. (PIA Sorsogon)

Bayan ng Juban at Irosin nakatanggap ng tulong mula sa Vietnamese Philanthropist

Tagalog News Release

Sorsogon City, March 10, (PIA) – Matapos na makipag-ugnayan sa tanggapan ni Sorsogon Governor Raul Lee ang grupo ni Supreme Master Ching Hai, kilala sa buong mundo bilang isang spiritual leader, artist at humanitarian, pormal nang ipinamahagi noong Martes sa mga bayan ng Juban at Irosin ang relief assistance mula sa mga ito.

Matatandaang una nang sinadya ng grupo na kinabibilangan nina Lin Hsu-O, Carol Chan, Younghun Han at Rosean Villoner nitong nakaraang Lunes, March 7, ang tanggapan ni Provincial Management Office (PMO) Executive Director Sally Lee upang talakayin ang mga hakbang kaugnay sa gagawing relief operations.

Mismong ang Provincial Disaster Risk Management Office (PDRMO) personnel na ang namili ng mga ipamamahagi sa mga pamilyang naapektuhan ng mga kalamidad sa Juban at Irosin na kinabibilangan ng bigas, sabon at mga sangkap sa pagluto.

Nabiyayaan  ang daan-daang mga pamilya mula sa barangay Ranggas, Catanusan, Sipaya, Taboc, Catanagan, Guruyan, Embarcadero, Binanhuan at Beriran sa bayan ng Juban at barangay Gulang-Gulang, Macawayan, Monbon, Tinampo, Gamapia at Tungdol sa bayan naman ng Irosin.

Pinamahalaan ng mga Local Government Units (LGUs), Municipal Disaster Risk Reduction and Management Council (MDRRMC) at Municipal Social Welfare and Development (MSWD) ng dalawang bayan pamamahagi ng mga relief assistance sa kani-kanilang mga barangay.

Sinabi ni SPDRMO head Jose Lopez na bahagi pa rin ito ng paglalaan ng mga serbisyong pang-emerhensya at saklolo pagkatapos ng isang sakuna bilang pagtugon sa mga pangunahing pangangailangan ng mga naapektuhan, ayon na rin sa ipinatutupad na DRRM Act 2010.

Tumulong din sa paghahanda ng isinagawang relief operations ang Provincial Social Welfare and Development (PSWD), Provincial Engineer’s Office (PEO) sa ginamit na sasakyan at mga inmates ng Sorsogon Provincial Jail (SPJ) na tumulong sa paghakot ng mga ipapadalang panaklolo sa mga napinsala ng mga nagdaang kalamidad.

Ang Vietnamese leader na si Master Ching Hai ay kilala ring tagapanguna sa lipunan ngayon sa paghahayag ng saloobin hinggil sa isyu ng climate change. Isa rin itong bantog na vegetarian at nanguna sa pandaigdigang kampanya na “Be Veg, Go Green, Save the Planet”. (BARecebido, VLabalan, PIA Sorsogon)

Balogo Sports Complex isasailalim sa rehabilitasyon

Tagalog News Release 
 

Sorsogon City, March 9, (PIA) – Inihahanda na ngayon ng Department of Education Sorsogon Schools Division ang isang panukala na isusumite nito kay Sorsogon Governor Raul Lee na magsasaayos ng Balogo Sports Complex dito sa lungsod ng Sorsogon upang magamit na ito dalawang taon mula ngayon para sa mga palarong idadaos dito.

Sa panayam kay Assistant Schools Division Superintendent Danilo Despi, inamin nitong walang sapat na kahandaan at angkop na mga pasilidad ang lalawigan ng Sorsogon sakaling mapagpasiyahang dito isagawa sa mga susunod na pagkakataon ang Palarong Bicol na nilalahukan ng ng mga manlalarong estudyante mula sa iba’t ibang mga paaralan sa buong rehiyon.

Sinabi pa ni Despi na bagama’t malawak ang Balogo Sports Complex ng Sorsogon City kung ikukumpara sa ibang lugar kung saan ginanap na ang Palarong Bikol, ay kailangan pa ng puspusang pagsasaayos nito at kaukulang tulong mula sa lokal na pamahalaan upang sa gayon ay palagi itong nakahanda sa mga manlalaro at lahat ng uri ng mga paligsahan.

Dagdag pa ng opisyal na kung maisasaayos ang lugar na pagsasanayan na ito ng mga manlalaro ng Sorsogon, mangibabaw ang kakayahan ng mga ito, lalong huhusay at hindi na mahuhuli sa mga palaro.

Matatandaang sa pangkalahatang resulta ng Palarong Bicol na ginanap ngayong taon ay naging 7^th placer lang ang lalawigan, subalit mas mataas ito kung ikukumpara sa naging resulta noong nakaraang taon na 10^th placer lamang. (BARecebido/VLbalan, PIA Sorsogon)

Simpleng Graduation Ceremony, ipinaalala ng Deped Sorsogon

Tagalog News Release

Sorsogon City, March 9, (PIA) – Muling pinaalalahanan ng DepEd Sorsogon ang lahat ng pamunuan ng mga paaralan sa buong lalawigan kaugnay ng mga graduation exercises na gagawin ngayong taon.

Ayon kay Assistant Schools Division Superintendent Danilo E. Despi, hindi kailangang gawing magarbo ang graduation ceremonies ng mga estudyante sa elementarya at sekondarya, sa halip ay gawin itong isang hindi makakalimutang okasyon para hindi naman maging pabigat pa sa bulsa ng mga magulang ang pagtatapos ng kanilang mga anak.

Ito ay bilang tugon na rin sa ipinalabas na kautusan ni Secretary Armin A. Luistro, ang DepED Order No. 4 Series of 2011.

Maaalala ding nakasaad naman sa DepED Order No. 8 Series of 2005 na bawal mangolekta ng graduation fees o anumang klaseng kontribusyon ang kahit na sinong kawani ng DepED, guro o public school head, at tanging miyembro o opisyal lamang ng Parents and Teachers Council Association o PTCA ang maaaring humawak ng pondo o kontribusyon depende sa napagkasunduan ng bawat partido.

Nakasaad din sa nabanggit na memorandum na simple lang ang dapat na isusuot ng mga magsisipagtapos at dedepende pa rin ito sa kagustuhan ng mga kasapi ng PTCA.

Nakasaad pa sa memorandum na ang kontribusyon para sa yearbook ay hindi rin sapilitan.

Tampok na tema ng pagtatapos ngayong taon ang “Ang magsisipagtapos: kaagapay tungo sa pagbabagong anyo ng lipunan; tugon sa hamon ng sambayanan.”

Itinakda ang mga graduation exercises para sa School Year 2010-2011 anumang araw sa pagitan ng Abril 1 at 7, 2011. (BARecebido/VLbalan,  PIA Sorsogon)

Bulkang Bulusan nananatiling tahimik, Phivolcs patuloy ang babala

Tagalog News Release

Mt. Bulusan nananatiling tahimik

Sorsogon City, March 9, (PIA) – Sa nakalipas na dalawampu’t-apat na oras, nananatiling tahimik ang Mt. Bulusan at patuloy pa ring natatakpan ng makapal na ulap ang tuktok nito kung kaya’t ayon sa Phivolcs ay hindi madaling ma-obserbahan ang anumang lumalabas o sumisingaw mula sa bibig nito.

Batay din sa mga na-obserbahan ng Phivolcs sa paligid ng bulkan simula nitong nakaraang Sabado, Marsch 5, wala ding gaanong pagbabago sa naging aktibidad nito simula noong nakaraang Enero 25 hanggang 29, hanggang sa malakas na pag-aalburuto nito noong Pebrero 21, 2011.

At dahil din sa direksyon ng hangin kung kaya’t patuloy na pinaalalahanan ng mga awtoridad ang mga residenteng nakatira malapit sa paanan ng bulkan, lalo na ang nasa bahaging hilaga-kanluran at timog-kanluran nito, na patuloy na mag-ingat sa posibleng ash falls.

Patuloy din ang paalala sa mga nakatira malapit sa mga lambak at mga ilog na patuloy na mag-ingat sa posibleng pagragasa ng lahar sakaling bumuhos ang malakas na ulan.

Nananatiling nasa alert level 1 status ang mga lugar sa paligid ng Bulkang Bulusan bunsod ng patuloy na aktibidad nito. (Ni: BARecebido/VLbalan, PIA Sorsogon)

Women’s Day Forum, tatalakay sa Juvenile Law, Character Program at pangangalaga sa kalikasan

By: Bennie A. Recebido

Sorsogon City, March 8, (PIA) – Bilang bahagi ng pagdiriwang ng Araw ng Kababaihan, isang Women’s Day Forum ang ginagawa ngayon dito sa lungsod ng Sorsogon.

Tampok sa Women’s Forum ang mga usapin o isyung may kaugnayan sa kaso ng mga kabataang naliligaw ng landas, at ang pagbuhay muli ng Character program na una nang sinimulan noon ni dating Gobernador Sally Lee.

Sa pamamagitan din ng Forum na ito ay mailalabas ang mga saloobin ng mga kababaihan ukol sa mga isyung may kaugnayan sa mga kanila, hindi lamang ukol sa pang-aabuso sa kanila at papel na ginagampanan nila sa paghubog sa mga kabataan kundi maging ang mga naabot na tagumpay ng mga kababaihan dito sa lalawigan ng Sorsogon.

Kabilang sa mga kalahok ay mga student leaders, mambabatas, guro at mga pari. Dito ay talakayin ang mga realidad na makakatulong sa pagbuo ng pahayag ukol sa pagrerebisa ng Juvenile Law lalo pa’t may mga nakikitang probisyong dapat na maamyendahan.

Ayon kay Sangguniang Panlalawigan Committee Chair on Women and Family Relations board member Rebecca Aquino, naniniwala ang konseho ng Provincial Gender Advocacy and Development (PGAD) na ang pagpapaigting pa ng kaugalian ng mga kabataan sa pamamagitan ng character program na kadalasang naiitang sa balikat ng mga kababaihan ang isa sa mga susi upang makabuo ng positibong pagbabago sa hanay ng bagong henerasyon.

Maliban sa mga usaping ito ay tatalakayin din sa forum ang pangangalaga sa kalikasan. Sa halip aniya na lecture type ang presentasyon, ilalahad ang mga usapin sa pamamagitan ng mga situational cases at statistical data presentation ng isyung may kaugnayan sa mga kababaihan at kabataan.

Ang mga tagapagsalita ay mula sa hanay ng Philippine National Police, Social Welfare and Development Office at Public Prosecutor’s Office.

Katuwang din ang Visayan Forum, Child Fund at FACE sa pagsasalatuparan ng aktibidad na ito. (PIA Sorsogon)