Publiko dapat na mag-ingat sa food poisoning

Ni: Bennie A. Recebido

Lungsod ng Sorsogon, Marso 23 (PIA) – Muling nagpaalala sa publiko ang Department of Health – Provincial Health Team (DOH-PHT) na mag-ingat sa iba’t-ibang mga sakit o karamdamamang maaaring maranasan hindi lamang sa panahong may mga pag-uulan kundi maging sa panahon ng summer.

Ayon kay DOH-PHT Leader Dr. Nap Arevalo, isa sa mga dapat na iwasan ng publiko ay ang food poisoning kung saan sa panahong maalinsangan o mainit ang temperatura ng panahon ay mas nagiging mabilis ang pagkapanis ng mga pagkaing maaaring maging sanhi ng food poisoning.

Ang food poisoning ay isang sakit na sanhi ng pagkain at pag-inom ng tubig na kontaminado ng bakterya o lason, mga parasite, virus o kemikal na nagdadala ng mga sumusunod na sintomas: sakit ng tyan, pagsusuka, pagtatae at sakit ng ulo. Sa mga seryosong pagkakataon, maaari din itong maging dahilan ng nakamamatay na sakit sa utak, atay at bato.

Ang mga pasyenteng nakararanas nito ay dapat na dalhin sa ospital, sumailalim sa aggressive hydration at gamutin ng antibiotic.

Samantala, inirerekomenda ng World Health Organization (WHO) ang lima at simpleng hakbang kung paanong maiiwasan ang food poisoning:

Una, panatilihin ang kalinisan. Hugasan ang mga gagamitin sa pagluto at ang kamay bago at habang naghahanda ng pagkain. Huwag hahayaang pamugaran ng mga insekto, peste at iba pang mga maruruming hayop ang kusina at pagkain.

Pangalawa, ihiwalay ang hilaw sa lutong pagkain. Dapat na magkaiba ang kagamitang pangkusinang gagamitin sa hilaw at lutong pagkain. Ang mga katas ng hilaw na karne, manok at lamang-dagat ay maaaring makabuo ng mapanganib na mikrobyo.

Pangatlo, lutuing mabuti ang pagkain lalo na ang mga karne, manok at seafoods. Lumalabas sa pag-aaral na ang mga pagkaing niluto sa 70 degrees Celsius na temperatura ay mas ligtas laban sa food poisoning.

Pang-apat, itago ang pagkain sa ligtas at tamang temperatura. Ang mga pagkaing hindi nakunsumo ay dapat na itago sa refrigerator matapos ang dalawang oras na exposure lalo na yaong madaling masirang pagkain, subalit hindi rin dapat na pagtagalin sa refrigerator ang mga pagkain ng ilang araw. Hayaang matunaw sa normal na paraan ang yelong nagpatigas sa pagkain at huwag ibabad sa tubig.

Panglima, gumamit ng malinis na tubig at mga sariwang pagkain. Basahin ang expiration date ng mga binibiling pagkain.

Ayon kay Dr. Arevalo, dapat na maging maingat ang publiko sa pagmantini sa kanilang kalusugan upang maiwasan ang malaking gastusin sa hinaharap. (PIA Sorsogon)

PGADC bumisita at nagsagawa ng mga aktibidad sa Home for the Boys

Ni: Bennie A. Recebido

Lungsod ng Sorsogon, Marso 23 (PIA) – Bumisita ang mga kasapi ng Provincial Gender Advocacy and Development Council (PGADC) sa Home for the Boys Regional Rehabilitation Center sa Barangay Pangpang, Sorsogon City noong Martes.

Ang aktibidad ay naisakatuparan sa pagtutulungan ng PGADC at ng Provincial Social Welfare and Development Office (PSWDO) kaugnay ng pagdiriwang ng Women’s Month ngayong taon.

Sinimulan ang aktibidad sa pamamagitan ng isang maikling programa kung saan nagbigay ng maikling mensahe ng inspirasyon si Sangguniang Panlalawigan Board Member at Committee on Women and Children Welfare Chair Rebecca Aquino at si PSI Romeo Gallinera, Chief, Police Community Relations ng Sorsogon Police Provincial Office.

Nagkaroon ng mga palaro, pagpapakain at pagbibigay ng counseling sa mga batang nangangailangan nito. Karamihan sa mga batang nasa Home for the Boys ay mga biktima ng iba’t-ibang uri ng mga pang-aabuso hindi lamang ng kanilang pamilya kundi maging ng lipunan.

Nagtapos ang aktibidad sa pamamagitan ng ibinigay na mensahe ni Casiguran Mayor Ester Hamor.

Ilan pa sa mga tampok na aktibidad na ginawa ng PGADC kaugnay ng selebrasyon ng Women’s Month ngayong taon ay ang talakayan sa radyo ng iba’t-ibang mga isyu ukol sa kababaihan kasama na ang Magna Carta for Women, Women’s Day Pampering noong March 12 kung saan tinuruan ang mga kababaihan ukol sa mga kasanayan para sa alternatibong pangkabuhayan, tree planting sa bayan ng Casiguran noong March 16 at Business Forum kahapon.

Magtatapos ang Women’s Month Celebration ngayong taon sa pamamagitan ng isang ‘Night for a Cause’ sa darating na ika-27 ng Marso, 2012. (SPPO, BArecebido, PIA Sorsogon)

Photos courtesy of PO2 Mike Espena, SPPO

Local DRRMC patuloy ang abiso sa publiko na mag-ingat sanhi ng pabago-bagong panahon

Ni: Bennie A. Recebido

Lungsod ng Sorsogon, Marso 22 (PIA) – Patuloy ang ginagawang monitoring at pag-uugnayan ng mga Local Disaster Risk Reduction and Management  Council  sa lalawigan ng Sorsogon kaugnay ng walang humpay na pag-uulan simula pa noong linggo ng gabi hanggang kagabi upang malaman ang kundisyon ng mga mamamayan dito.

Ayon sa Sorsogon Provincial Disaster Risk Management Office kahit pa nga lumabas na rin ang araw ngayon ay nakaalerto pa rin ang kanilang rescue unit sa mga epekto ng nakalipas na mga pag-uulan lalo sa mga aydetipikadong lugar sa buong probinsya.

Inabisuhan din ng SPDRMO ang mga residenteng nakatira malapit sa mga paanan ng bundok, mga ilog at sapa at mga nakatira sa mababang lugar na maging alerto, doblehin ang pag-iingat at maging handa lalo sa panahong walang tigil ang pag-uulan. Pinayuhan din ang publiko na ugaliin ang pakikinig sa mga abisong pangkaligtasang ibinibigay ng mga awtoridad ng pamahalaan.

Samantala, kahapon ay may ilang mga ulat ng pag-apaw ng spillway sa ilang mga lugar dito tulad ng Bulan kung saan naging lampas tuhod din ang tubig dahilan upang hindi makadaan ang ilang mga mag-aaral at mga residente.

Sa bayan at Casiguran naman, tumaas din ang tubig sa ilog na sakop ng mga Barangay ng Sta. Cruz, Escuala, Rizal at Tigbao na naging sanhi upang umapaw ang spillway at dahilan upang hindi makadaan ang mga maliliit a sasakyan at mga residente ng apat na barangay.

Base naman sa ulat ng Sorsogon Provincial Police office, may isang animnapung gulang na ginang din ang naiulat na inanod ng malakas na agos ng tubig kahapon habang tumatawid sa binahang spillway sa boundary ng Brgy. Sapnangan, Bulusan, Sorsogon at patuloy pa ring hinahanap ng mga awtoridad hanggang ngayon.

Wala namang naiulat na mga pagguho ng lupa habang patuloy na sinusubaybayan ng mga awtoridad ang mga lugar na madalas ay apektado ng mga kalamidad. (BARecebido, PIA Sorsogon)

Pagsasadokumento ng mga OFW sa Sorsogon City isinasagawa

Ni: Bennie A. Recebido

Lungsod ng Sorsogon, Marso 22 (PIA) – Bilang tugon ng pamahalaang lokal ng lungsod ng Sorsogon sa kahilingan ng Overseas Workers Welfare Administration (OWWA) na maisadokumento ang lahat ng mga Pilipinong nagtatrabaho sa ibang bansa, nakikipag-ugnayan ngayon ang Sanggniang Panlungsod sa mga kapitan ng animnapu’t-apat na mga barangay sa buong lungsod ng Sorsogon.

Ayon kay Sorsogon City Councilor Aldin Ayo, upang maisadokumento ng tama ang mga Sorsoganong nagtatrabaho sa ibang bansa, minabuti nilang makipag-ugnayan sa mga kapitan ng barangay upang matukoy kung sinu-sino ang mga OFWs sa kanilang lugar lalo na’t ang mga kapitan ng barangay ang higit na nakakaalam ng profile ng mga residente nila sa kanilang lugar.

Si Councilor Ayo ang binigyan ng kapangyarihan ng 4^th Sorsogon City Council na mangasiwa sa pagsasadokumento at sa paghahanda para sa iminumungkahing pagpapatawag ng OFW assembly ng mga taga-lungsod sa hinaharap.

Maliban dito ay balak din nilang bumuo at makapagpasa ng mga ordinansang makakatulong sa kapakanan ng mga taga-lungsod na OFWs.

Nanawagan din sila sa mga OFWs o sa mga kamag-anak nito na makipag-ugnayan sa kapitan ng barangay kung saan sila nakatira upang ibigay ang mga datos na kailangan para sa pagdodoumento ng mga OFWs partikular yaong naroroon sa mga lugar o bansang hindi gaanong kilala. (BARecebido, PIA Sorsogon)

Pagsasadokumento ng mga OFW sa Sorsogon City isinasagawa

Ni: Bennie A. Recebido

Lungsod ng Sorsogon, Marso 22 (PIA) – Bilang tugon ng pamahalaang lokal ng lungsod ng Sorsogon sa kahilingan ng Overseas Workers Welfare Administration (OWWA) na maisadokumento ang lahat ng mga Pilipinong nagtatrabaho sa ibang bansa, nakikipag-ugnayan ngayon ang Sanggniang Panlungsod sa mga kapitan ng animnapu’t-apat na mga barangay sa buong lungsod ng Sorsogon.

Ayon kay Sorsogon City Councilor Aldin Ayo, upang maisadokumento ng tama ang mga Sorsoganong nagtatrabaho sa ibang bansa, minabuti nilang makipag-ugnayan sa mga kapitan ng barangay upang matukoy kung sinu-sino ang mga OFWs sa kanilang lugar lalo na’t ang mga kapitan ng barangay ang higit na nakakaalam ng profile ng mga residente nila sa kanilang lugar.

Si Councilor Ayo ang binigyan ng kapangyarihan ng 4^th Sorsogon City Council na mangasiwa sa pagsasadokumento at sa paghahanda para sa iminumungkahing pagpapatawag ng OFW assembly ng mga taga-lungsod sa hinaharap.

Maliban dito ay balak din nilang bumuo at makapagpasa ng mga ordinansang makakatulong sa kapakanan ng mga taga-lungsod na OFWs.

Nanawagan din sila sa mga OFWs o sa mga kamag-anak nito na makipag-ugnayan sa kapitan ng barangay kung saan sila nakatira upang ibigay ang mga datos na kailangan para sa pagdodoumento ng mga OFWs partikular yaong naroroon sa mga lugar o bansang hindi gaanong kilala. (BARecebido, PIA Sorsogon)