Evacuees sa Sorsogon makakauwi na ngayong araw; bilang ng mga strandees tumaas pa

Ni: Bennie A. Recebido

Sorsogon City, May 26 (PIA) – Kahit papano ay nakahinga na ng maluwag ang mga Sorsoganon matapos na ideklara ng PAGASA na gumalaw at tumaas na ang coordinates ng bagyong Chedeng at lihis na ito sa Sorsogon.

Kaugnay nito, inaasahang magsisibalikan na rin sa kani-kanilang mga tahanan ang mga nagsilikas na mga residente kahapon na nagpa-umaga na sa mga evauation centers.

Matatandaang sa tala ng mga evacuees na nakalap ng PIA Sorsogon Information Center kaninang madaling araw, Sa brgy. Talisay dito sa Sorsogon City: 108 pamilya o 496 individuals ang nanatili sa Sorsogon Pilot Elementary School; 69 pamilya o 332 inviduals sa St. Louise de Marillac College of Sorsogon habang 15 katao naman ang nanatili sa Mateo Apartment.

May mga evacuees ding naitala sa bayan ng Barcelona at Juban lalo na sa Brgy. Lajong at Binanuahan subalit hindi pa sila naglabas ng pinaka-eksaktong bilang ng mga nagsilikas.

Wala ding naitalang mga pagbaha, mudflows at landslides dito hanggang sa kasalukuyan. Subalit patuloy pa ring pinag-iingat ng mga awtoridad ang mga residente lalo pa’t patuloy pa rin ang mga mahinang pag-uulan dito simula pa kagabi.

Samantala, sa inilabas namang tala ng Philippine Coast Guard Sorsogon City Station ng mga strandees as of 10AM ngayon: sa Matnog port - 4,567 passengers, 97 buses, 92 trucks at 36 light cars; sa Bulan port – 385 passengers, 9 buses at 6 trucks habang 200 passengers naman ang stranded sa Pilar port.

Ayon kay PCG Sorsogon City station commander LtJG Ronnie Ong, inaasahan na nilang tataas pa ang bilang ng mga strandees habang nananatiling nakataas ang public storm signal sa Sorsoogn kaugnay ng bagyong Chedeng. (PIA Sorsogon)

Ticketing Centers ng mga airlines dapat na maging responsable sa kapakanan ng kanilang kustomer

Ni: Bennie A. Recebido

Sorsogon City, May 26 (PIA) – Naghayag ng pagkainis ang ilang mga pasahero ng Philippine Airlines sa isang ticketing center dito sa lungsod ng Sorsogon matapos na hindi ito makuntento sa sagot ng agent ukol sa kanilang inquiries kaugnay ng sistema sa posibilidad ng kanselasyon ng kanilang mga flights kung saan sarkastikong sinabi nitong tawagan na lamang ang PAL at doon makipag-ugnayan sapagkat wala silang alam dahil ticketing center lamang sila.

Matapos na ideklarang nasa ilalim ng signal number 2 ang halos ay buong Bicol region at lumabas ang ilang balitang may mga kanseladong air travel kahapon ay nagsimulang mangamba ang mga pasaherong nakaiskedyul ang byahe ngayong araw. Buti na lang diumano at hindi nakansela ang byahe sa kabila ng kanilang nerbyos dahilan sa tinatawag na strong turbulence sa alapaap.

Kaugnay nito, nanawagan ang ilang customer ng mga airlines ticketing centers dito na maging responsable din sa kapakanan ng kanilang mga customer sa pamamagitan ng tamang pasilitasyon ng kanilang mga inquiries at hindi yaong limitado lamang ito sa koleksyon ng booking payment.

Umapela din ang mga ito sa mga airlines na bigyan din ng tamang oryentasyon ang kanilang mga ticketing booth partners ukol sa kanilang sistemang makapagbibigay ng seguridad at kaginhawahan ng kanilang mga pasahero lalo na’t isang oras pang byahe ang Sorsogon patungong Legazpi City sa lalawigan ng Albay kung saan naroroon ang pinakamalapit na airport. (PIA Sorsogon)

Bicol-grown ‘pili’ has the fragrance world over a barrel

Bicol-grown ‘pili’ has the fragrance world over a barrel

Mga awtoridad patuloy na pinaghahanda ang mga residente sa nakaambang pagtama ng bagyong Chedeng

Ni: Bennie A. Recebido

Sorsogon City, May 25 (PIA) – Inabisuhan na ng Provincial Disaster Risk Reduction and Management Office ang mga residente sa mga lugar na madalas daanan ng mga pagbaha, pagtaas ng tubig at daluyan ng lahar lalo pa’t may abiso na rin ang PAGASA sa posibilidad ng pagbuhos ng ulan ngayong araw.

Sa naging pahayag ni PDRRMC Action Officer Manro Jayco, sinabi nitong ibinigay na nila sa mga LGU partikular sa mga bayan ng Juban, Irosin, Bulan, Pilar, Casiguran at Sorsogon City ang kaukulang istratehiya sa paghahanda alinsunod na rin sa kani-kanilang contingency plan.

Nanawagan din si Jayco sa mga residente na maging alerto at gawin ang pre-emptive evacuation nang mas maaga at huwag nang hintayin pang dumilim bago isagawa ang paglilikas upang maiwasan ang mga untoward incidences.

Kahapon ay ipinag-utos na rin ni Sorsogon Governor Raul R. Lee sa lahat ng mga concerned agencies ang maagap na kahandaan sa posibleng pagdaan ng bagyong Chedeng.

Sinabi din ni Gov. Lee na bago pa man umano mag-landfall ang bagyo ay particular na niyang pinatutukan ang pagsagip sa mga pananim at imprastruktura sa lalawigan sa tulong na rin ng provincial Agriculture Office at Department of Public Works and Highways (DPWH).

Patuloy din ang pagtaas ng bilang ng mga strandees sa tatlong pangunahing pantalan dito kung saan sa pinakahuling tala ng Philippine Coast Guard Sorsogon Station, alas-onse ngayong umaga, ang stranded passengers sa Matnog  ay 1,556 , 45 - buses, 7 - trucks at 2 - light cars; Bulan – 210 passengers, 7 buses at 6 trucks habang sa Pilar naman ay 120 passengers at tatlong vessels.

Samantala, ngayong itinaas na sa Public Storm Signal no. 2 ang lalawigan Sorsogon, nangangamba ang karamihan sa mga residente dito sa perwisyong maaaring dalhin ng bagyong Chedeng sakaling tumama ito sa kalupaan lalo pa’t kakaiba ang temperature at galaw ng panahon ngayon dito.

Hindi maiwasan ng ilang residente lalo na ng mga may edad na dito na ihambing ang kondisyon ng panahon ngayon na anila’y kahalintulad ng bagyong Sisang noon, na signal number 2 na ay mainit at maalinsangan pa rin ang panahon, subalit nang tumama sa lupa ay nagdulot ng napakalaking pinsala sa buhay at kabuhayan ng mga residente. (PIA Sorsogon)

Pili production sa Sorsogon higit pang palalaguin

Pili production sa Sorsogon higit pang palalaguin

Ni: Bennie A. Recebido

Sorsogon City, May 25 (PIA) – Isang Pili Procurement Center o bagsakan ang nakatakdang itayo sa bayan ng Irosin, Sorsogon upang matulungang umasenso pa ang mga pili farmers sa lalawigan.

Ang hakbang ay bunsod na rin ng lumabas sa pag-aaral ng Sorsogon Pili Producers Cooperative (SPPC) ukol sa tatlong kalakaran sa panig ng mga magsasaka kung paano nilang pinagkakakitaan ang mga produktong pili.  Ito ay ang pagbebenta ng matured na pili o “langta” sa mababang halaga sa palengke o sa nangangalakal sa barangay; ibenta ang “lagting” o bunga ng pili na pinatuyo matapos alisan ng pulp o outer cover; at ang pagbebenta ng pili nut na inalis mula sa pili shell o mas kilala sa tawag  na “elog”.

Sa kasalukuyang bentahan ng pili, sa bawat 100 piraso, nagkakahala ang “langta” ng P35-P40, habang ang “lagting” ay nagkakahalaga ng P50-60, ang “elog” naman ay nagkakahalaga ng P60-P80. Mas tumataas ang halaga ng bentahan kapag nadadagdagan ang prosesong ginagawa sa pili.

Bagama’t karamihan sa pili nut ay galing sa Sorsogon, ito rin ang gumagalaw na presyo ng bentahan sa maliliit na processors sa lungsod ng Naga na siya ngayong nakikipag-ugnayan sa sa SPPC upang makakuha ng tiyak na suplay ng magandang uri ng pili.

Sa analisis ngayon ng Sorsogon Pili Producers Cooperative, balak nila ngayong magtatag ng Pili Procurement Center sa bayan ng Irosin kung saan mas marami doon ang pili, at doon na rin sa bagsakan gagawin ang pagpapatuyo at pagtitilad ng lagting, nang sa gayon ay maibenta ito ng mga pili farmers sa tamang presyo at makapagbibigay pa ang kooperatiba ng patronage refunds at dividends sa mga kasapi nito. (PIA Sorsogon)

Public Hearing sa HB 1330 dito sa Sorsogon naging matagumpay

Public Hearing sa HB 1330 dito sa Sorsogon naging matagumpay

Ni: Bennie A. Recebido

Sorsogon City, May 24 (PIA) – Dinaluhan ng mga kinatawan mula sa iba’t-ibang sektor dito ang isinagawang public hearing sa Gubat Multi-Purpose Gymn, Gubat, Sorsogon noong Biyernes, May 20, kaugnay ng isinusulong na Brgy. Integrated Development Approach for Nutrition Improvement (BIDANI) Act of 2010 o House Bill 1330.

Layunin ng isinagawang public hearing sa pangunguna ni Cong. Rodante Marcoleta ng Alagad Partylist na kunin ang pulso ng publiko ukol sa nasabing House Bill at paigtingin ang kooperasyon at partisipasyon ng mga academic institution at local government units sa pagsusulong ng nutrisyon sa bansa.

Nais rin nitong hikayatin ang nag-iisang State College dito na luminang ng epektibong action-research program na magpapataas sa antas ng nutrisyon at pagkatao ng mga mahihirap sa pamamagitan ng pagpapaunlad ng mga lokal na komunidad at pagpapaigting pa ng produktibidad ng mga mahihirap na ito sa barangay sa pamamagitan ng pagpapataas ng antas ng kanilang nutrisyon at pamumuhay.

Ilan sa mga key provisions ng HB 1330 ay ang makapagtayo ng Brgy. Integrated Development Approach for Nutrition Improvement o BIDANI bilang isang nutrition-in-development research program; bigyang kapangyarihan ang National Nutrition Council (NNC) na gumawa at maglabas ng mga kinakailangang patakaran para sa epektibong pagpapatupad ng batas; bigyan ng kaukulang pondo ang mga state colleges at universities na magpapatupad nito; at payagang makalikom ng pondo, donasyon at iba pang uri ng suportang pinansyal mula sa mga lokal at dayuhang indibidwal, institusyon o pamahalaan para sa pagpapatupad ng BIDANI network program.

Naroroon sa pagtitipon ang tatlong kinatawan ng Ako Bikol Partylist na sina Atty. Alfredo Garbin, Jr. Rep. Christopher Co at Rep. Rodel Batocabe; Una ang Pamilya Partylist Rep. Reena Concepcion Obillo; Committee Chairperson at Quezon province 1^st District Rep. Wilfredo Mark M. Enverga, committee members mula sa Kongreso kabilang na si Sorsogon 2^nd district Congressman Deogracias Ramos, Jr.; Committee Members on Rural Development; mga local na residente at media.

Positibo naman si Rep Marcoleta, ang may-akda ng House Bill na maipapasa sa Kongreso ang nasabing panukala. (PIA Sorsogon)