Industriya ng turismo sa Sorsogon lalong pagagandahin

Ni: Bennie A. Recebido

Sorsogon City, April 7 (PIA) – Hiniling ni Sorsogon Governor Raul Lee ang kooperasyon ng Sangguniang Bayan ng Donsol at ng mga awtoridad upang higit pang mapaganda at mapalago ang industriya ng turismo sa Donsol.

Sa ginawang pulong na pinangunahan ni Gov. Lee kung saan naroroon din si PNP Regional Director Gen. Cecilio Calleja, PNP Sorsogon Provincial Director Heriberto Olitoquit, Donsol PNP municipal chief Perfecto Lavinia at mga kasapi ng Sangguniang Bayan ng Donsol, sinabi ni Lee na dapat na magkaisa at suportahan ang lokal na turismo upang mas makahikayat pa ng mga dadayong turista sa lalawigan lalo pa’t sa ngayon ay talagang mataas ang bilang ng mga turistang naririto bilang antisipasyon na rin sa darating na Butanding Festival 2011 sa huling linggo ng Abril.

Ayon kay Gov. Lee mas tinutukan niya ang mga hakbang na dapat gawin upang mapaganda pa ang turismo sa Donsol sa halip na ang tungkol sa pagresolba sa kaso ng robbery hold-up noong April 5 sa isang resort doon sapagkat ibinigay-bahala na niya ito sa PNP.

Ilan sa mga rekomendasyon ni Lee SB Donsol ay ang: tipunin ang mga barangay officials, tanod, awtoridad at mga resort owners upang pag-usapan kung ano ang mga nararapat na hakbang na dapat nilang gawin base sa kani-kanilang mga pangangailangan upang matiyak ang seguridad ng mga tao sa Donsol; i-deputize na ang mga barangay tanod upang maging katuwang ng mga pulis sa pagpapanatili ng peace and order situation sa lugar; pagsusuot ng mga uniporme ng boat owners/drivers at mga Butanding Interaction Officers upang mas maging disente at para na rin sa kaukulang identification ng mga ito; at palakasin ang police intelligence at visibility sa mga lugar na dinadayo ng mga turista at mga establisimyento.

Sinabi din ni Lee na P50 million mula sa P350 loan project ng lalawigan ay ibubuhos sa tourism at infrastructure development sa Donsol. Layon din ng gobernador na magtayo ng baywalk doon na magsisilbing pasyalan pa ng mga turista.

Nanawagan din si Gov. Lee sa mga awtoridad, local officials at sa publiko na suportahan ang development ng trurismo dito sa Sorsogon.

Samantala, inatasan na rin ni PNP regional director Calleja ang mga awtoridad dito na gawin ang lahat ng kaukulang hakbang upang mapabilis ang paglutas sa kaso at tiniyak naman ni Sorsogon provincial director Olitoquit na gumagalaw na ang kanyang mga tauhan sa pagtugis sa mga suspek lalo na’t may lead na rin sila sa pagkakakilanlan ng mga ito.

Sinabi naman ni Sangguniang Bayan member at Tourism Committee chair Ronald Malillin na palalagyan pa nila ng mga street lights ang natitirang 500 meters na kahabaan ng kalye mula sa Donsol bridge hanggang sa pinakadulong resort sa Brgy. Pangpang.

Well-taken din aniya ng mga SB members ang mga iminungkahi ni Gov. Lee at handa silang tumulong at suportahan ang PNP para sa mas mabilis na ikalulutas ng robbery-hold up incident. (PIA Sorsogon)

Tourist arrivals sa Sorsogon tumaaas noong 2010

Tagalog News Release

Sorsogon City, April 7 (PIA) - Umabot sa 21% ang itinataas ng kabuuang bilang ng mga dayuhan at local na turistang dumayo sa lalawigan ng Sorsogon noong nakaraang taon.

Sa comparative data na ipinalabas ng Department of Tourism Region V sa taong 2009 at 2010, lumalabas na 84,354 ang mga local at foreign tourists na bumisita sa Sorsogon noong 2009 habang 101,799 naman noong nakaraang taon, mas mataas ito ng 17,445 o 21% kumpara noong 2009.

Pumapangatlo lamang ang Sorsogon sa may pinakamalaking bilang ng mga tourist arrivals kung saan nangunguna dito ang Camarines Sur na may 49,75% habang pumangalawa ang Albay na may 27%, mas mataas lamang ng 6% kumpara sa Sorsogon.

15.56% naman ang itinaas ng Camarines Norte na pumang-apat, 15% ang Catanduanes na panglima at pang-anim naman ang Masbate na bumagsak sa negative 7% ang growth rate.

Sa nasabi ring tala, makikitang bumaba ang bilang ng foreign tourist arrivals sa Sorsogon ngunit bumirit naman ng mataas ang domestic tourist arrivals.

Ang nasabing mga datos ay kinuha ng DOT mula sa iba’t-ibang mga establisimyento base sa kanilang naging akomodasyon sa mga turista.

Kabilang naman sa Bicol Tourism top 10 market ng mga bisitang dumadayo sa Bicol region ang mga sumusunod: USA, United Kingdom, South Korea, Israel, Australia, Bulgaria, Germany, Sweden, France at Canada.

Positibo pa rin ang DOT na mas dadami pa ang bilang ng mga turistang dadayo dito sa rehiyon ng Bicol ngayon at sa mga darating pang taon. (Bennie A. Recebido, PIA Sorsogon)

Sorsogon Bay nananatiling ligtas sa Paralytic Shellfish Poisoning

Ni: Bennie A. Recebido

Sorsogon City, April 6 (PIA) – Mula nang i-lift ang total shellfish ban sa Sorsogon noong March 21, 2011 dahilan sa pagiging red tide free ng Juag Lagoon sa Matnog at Sorsogon Bay sa Sorsogon ay nananatili pa ring ligtas sa paralytic shellfish poisoning ang mga lamang-dagat dito hanggang sa kasalukuyan kung kaya’t walang dapat na ikabahala ang mga nakadepende sa shellfish industry dito.

Subalit sa ginawang latest monitoring sa public market ng Sorsogon City, mangilan-ngilan lamang ang nagbebenta ng shellfish dito at halos ay wala ding nakikitang tahong sa mga pamilihan.

Ayon sa mga tindera ng shellfish, sa tagal ng inilagi ng red tide, hindi na rin nakapagtanim pa ng shellfish ang mga magtatahong dito at ito ang tinitingnang dahilan kung bakit madalang o halos ay walang nakikitang ibinebentang tahong sa mga lokal na pamahilihan dito.

Kadalasang makikita at mabibili na lamang dito ay ang badoy, talaba at baloko. Dalangin naman ng mga nakadepende sa shellfish industry dito na nawa’y magtagal pa ang pagiging red tide free ng Sorsogon Bay nang sa gayon ay tuluyang mabuhay na muli ang industriya ng tahong industry kung saan dating sikat at dinarayo ang Sorsogon. (PIA Sorsogon)

UNWFP, EMI, nagsagawa ng Capacity Needs Assessment para sa Disaster Preparedness and Response

UNWFP, EMI, nagsagawa ng Capacity Needs Assessment para sa Disaster Preparedness and Response

Ni: Bennie A. Recebido

Sorsogon City, April 5 (PIA) – Matapos ang isinagawang workshop kamakailan para sa mga kasapi ng Provincial Disaster Risk Reduction Management Council, isinunod ng United Nations World Food Programme-Philippines (UNWFP) Earthquake sa pamamagitan ng Megacities Initiative Incorporated (EMI) ang pagtatasa sa dalawang bayan sa lalawigan na kunsideradong pinakalantad sa iba’t-ibang mga uri ng panganib.

Ayon kay Sorsogon Provincial Disaster Risk Management Office PIO Von Labalan, layunin ng pagtatasa o assessment na maisa-chart ang mga capacity development activities na nagawa na, matukoy ang mga kakulangan at makapagbigay ng mga tiyak na intervention upang mabawasan ang kahinanaan ng mga komunidad na ito sa tuwing may kalamidad.

Ang Juban at Irosin ang dalawang bayan sa Sorsogon na tinukoy ng PDRRMC bilang mga potential sites para sa gagawing municipal assessment na ito base na rin sa kanilang multi-hazard exposure at income classification.

Ayon pa kay Labalan, ang Juban at Irosin ang laging natatamaan at partikular na naaapektuhan ang kabuhayan ng mga magsasaka at mangingisda dito sa tuwing nag-aalburuto ang Mt. Bulusan.

Tuwing maulan naman ay nalulubog sa lahar flows ang mga gully sa bayan ng Irosin na kadalasang dumadaloy at nakaaapekto sa sa mga mabababang barangay nito.

Catch basin naman ang bayan ng Juban ng mga sobrang tubig at lahar mula sa Irosin na dumadaloy patungong Cadac-an River at dinadala naman ang lahar patungo sa bunganga ng Sorsogon Bay kung saan natitipon ito doon at kinakailangang hukayin.

Ang mga bayan ng Irosin at Juban ay mga 3^rd at 4^th class municipalities kung saan sa tuwing mag-aalburuto ang bulkang Bulusan ay nagbibigay ng matinding epekto sa ekonomiya at pagsulong ng nasabing mga lugar. (PIA Sorsogon)

Mga negosyante sa Sorsogon City dapat na sumunod sa City Tax Ordinance

Ni: Bennie A. Recebido

Sorsogon City, April 5 (PIA) – Mas hihigpitan ngayon ng Sorsogon City permit and Licensing Office ang mga negosyanteng hindi sumusunod sa ipinatutupad na Tax Ordinance ng lungsod ng Sorsogon.

Sa naging pahayag ni City Permit and Lincensing Office Chief Jose Pura, ipinaliwanag nito sa publiko lalo na sa mga nagnanais na magtayo ng mga negosyo, maliit man o malaki, na gawing legal ang kanilang operasyon sa pamamagitan ng pagkuha ng kaukulang permit at pagbayad ng tamang buwis.

Aniya, kailangang kumuha ng mga sumusunod na dokumento ang nais magtayo ng maliliit na negosyo: sedula ng may-ari at tauhan nito, brgy clearance mula sa barangay kung saan itatayo ang negosyo, Department of Trade and Industry (DTI) permit, sanitary permit mula sa Rural Health Unit (RHU), Community Environment and Natural Resources (CENRO) certificate, engineering permit at clearance mula sa Bureau of Fire (BFP).

Nilinaw din niyang barangay permit lamang ang kukunin ng mga negosyantreng may daily gross sales na P137 pababa, habang city permit naman para sa may mga daily gross sales na P138 pataas. (PIA Sorsogon)