Sorsogon Provincial Health Office provide free flu vaccine to indigent senior citizens

By Irma A.  Guhit

SORSOGON CITY, JANUARY 4 (PIA)….” Indigent senior citizens (SC) here in the province of Sorsogon are now provided free flu vaccines to address earlier most of the respiratory health problems brought about by old age. Indigent old people usually suffer respiratory diseases due to cold weather condition, poor living conditions and poor diet, “Dr. Liduvina D. Dorion informed the public in her regular radio program "Paalalang Pangkalusugan" yesterday.

Dorion informed all workers in the barangay health centers  here in the province to inform the local officials especially the barangay captains that free flu vaccine is available to the indigent senior citizens since according to the Department of Health (DOH) report, they are one of the most vulnerable age groups affected by influenza and pneumonia.

With the continuous rainy season and cold weather conditions now being felt here in the province, the provincial government and the DOH have joined forces and focused most of their health priorities to children and the old people who seem to have been most of the age groups confined in hospitals due to flu, fever and colds that if not properly treated or given early prevention like vaccination could lead to a more serious health problem.

Dorion said that those indigent SCs are most prone to this kind of sickness due also to low immune disease diffeciency as most are not well attended at homes and most also lack the proper nutrition and diet due to financial conditions.

She also explained that even some of these SCs still work, others are left to take care of some young family members left at home particularly if other members in the family are also at work.  

“Let us not forget that these SCs have their health rights to be attended to by their families and government as most of them also before have been part of the productive mainstream society, ”Dorion explained.

“Most have somehow have contributed also to their communities but because of financial constraints, mostly can not avail of the cost of medicines, particularly vaccines or are not given priority by some members of the household, she said.

“Today, the Code White program implementation of the DOH as a mitigating health strategy and as part of the disaster risk reduction management mechanism has seen to it that health is one of the priority concern provided early intervention so that mitigation for health concerns be addressed,” Dorion concluded. (PIA-SORSOGON)

Pamahalaan prayoridad din ang kalusugan ng mga matatanda

Ni: Bennie A. Recebido

LUNGSOD NG SORSOGON, January 3 (PIA) – Sa patuloy na pabago-bagong panahon, pag-uulan at malamig na klima hanggang sa kasalukuyan, nais makatiyak ng mga opisyal ng kalusugan sa Sorsogon na mapapangalagaan hindi lamang ang kalusugan ng mga bata kundi maging ng mga matatanda rin sa bawat komunidad.

Kaugnay nito, sa pamamagitan ng pagtutulungan ng lokal na pamahalaan ng Sorsogon at ng Department of Health (DOH) nagsasagawa ngayon ang nasabing mga ahensya ng pagbabakuna sa matatandang residente upang maiiwas ito sa mga mas seryoso pang mga sakit lalo na’t sa tala ng Provincial Health Office ay mataas din ang bilang ng mga matatandang isinusugod sa ospital dahilan sa mga sakit na dala ng pabago-bagong kondisyon ng panahon.

Ayon kay Assistant Provincial Health Office Dr. Liduvina Dorion, matatanda man ay may mga karapatan din itong dapat na mabigyang pansin hindi lamang ng pamahalaan kundi maging ng kanila ding mga kaanak. Ang mga senior citizen umano ay kabilang sa mga vulnerable group ng komunidad lalo yaong mga walang kakayahang maipagamot ang kanilang mga sarili dahilan na rin sa kahirapan.

Sinabi din ni Dorion na inabisuhan na rin niya ang lahat ng mga barangay health workers sa lalawigan na sabihan ang mga opisyal sa barangay partikular ang mga kapitan sa barangay na mayroon nang mga nakahandang flu vaccine o bakuna ang DOH para sa mahihirap na mga senior citizen.

Mas mainam umanong maagapan na sa lalong madaling panahon sa kabila ng edad ng mga ito at mapabakunahan ng flu vaccine nang sa gayon ay maging malakas ang resistensya nito laban sa mga sakit tulad ng trangkaso, sipon, ubo at pulmonya na kadalasang nararanasan ng mga lolo at lola. (PIA Sorsogon)

Organisasyong magpapalawak pa sa kampanya laban sa ipinagbabawal na gamot binuo

Ni: Bennie A. Recebido

LUNGSOD NG SORSOGON, January 3 (PIA) – Bilang pakikiisa sa kampanya ng pamahalaan na masugpo ang pag-abuso sa mga ipinagbabawal na gamot, isang organisasyon ang binuo ng ilang mga  piling kasapi ng media sa lungsod ng Sorsogon na magpapalawak at magpapaigting pa sa kaalaman laban sa ipinagbabawal na droga.

Ayon kay Aga Eduarte isa sa mga nag-organisa sa SAIDO, pinangalanan nila itong Sorsogon Anti-Illegal Drugs Organization (SAIDO) at ipinarehistro na rin sa Security and Exchange Commission noong Nobyembre 201.

Prayoridad nila ang pagsasagawa ng mga Information and Education Campaign (IEC) sa mga paaralan, mga kabataan kasama na ang mga out of school youth na balak nilang ipunin sa pamamagitan ng pederasyon ng Sangguniang Kabataan ng Sorsogon.

Dagdag pa ni Eduarte na dahilan sa bago pa lamang ang kanilang organisasyon ay tututukan na muna nila ngayong buwan ng Enero ang pagsasaliksik sa iba’t-ibang mga ahensya na maaaring maging katuwang ng SAIDO upang mapaigting ang kanilang pagpapalawak ng impormasyon at kaalaman ukol sa droga.

Maliban sa pakikipagkawing sa ibang mga ahensya, isa rin umano sa tututukan nila ngayong Enero ang produksyon ng mga hand-outs kasama na ang mga flyers, poster at mga booklet na magbibigay ng mga kakukulang kaalaman ukol sa mga ipinagbabawal na droga at sa pag-iwas dito.

Suportado din umano ang hakbang na ito ng isang aktibong Sorsoganong si Quezon City Anti-Drug Abuse Council Chief at Quezon City Rotary Club President Eric Domas kung saan nangako itong tutulungan ding maikawing sa Dangerous Drug Board of the Philippines ang nasabing organisasyon. (PIA Sorsogon)

Transaksyon sa mga tanggapan balik na sa normal; mga mag-aaral balik-eskwela bukas

Ni: Bennie A. Recebido

LUNGSOD NG SORSOGON, January 2 (PIA) – Matapos ang holiday break kaugnay ng naging selebrasyon ng pasko at bagong taon, balik na ngayon sa normal ang transaksyon sa iba’t-ibang mga tanggapan ng mga pamahalaang lokal at nasyunal sa buong lalawigan.

Sa isinagawang pag-iikot ng PIA Sorsogon alas-otso y medya ng umaga kanina, bago pa man magbukas ang mga courier, cargo at mga bangko ay pila na ang mga kliyente para sa kani-kanilang mga transaksyon.

Sa mga pantalan at terminal ng bus naman, simula pa kahapon ay dagsa na ang mga pasahero kaugnay na rin ng pagsisibalikan ng mga bakasyunista at maging ng mga mag-aaral lalo pa’t balik-eskwela na rin ang mga ito bukas.

Inatasan na rin ni Sorsogon City Police Chief PSupt Edgardo Ardales ang kanyang mga tauhan na maging alerto sa posibilidad ng pagdagsa ng mga mag-aaral bukas at sa magiging mabigat na daloy ng trapiko sa kabisera ng lungsod.

Nanawagan din ang mga awtoridad sa mga mag-aaral na maging maingat sa kanilang mga kagamitan at mga allowance at iwasan ang mga kaduda-dudang mga taong lumalapit sa kanila upang maiwasang maloko o mapagsamantalahan ng mga masasamang elementong nais lamang maghasik ng mga kaguluhan. (PIA Sorsogon)

Kampanya sa “Iwas Paputok” tagumpay; selebrasyon ng Bagong Taon matiwasay

Ni: Bennie A. Recebido

LUNGSOD NG SORSOGON, January 2 (PIA) – Matagumpay sa kabuuan ang naging kampanya ng mga awtoridad ukol sa iwas paputok o ang kampanyang “Aksyon: Paputok Injury Reduction” sa lalawigan ng Sorsogon.

Ito ay matapos na makapagtala ng zero casualty ang lalawigan kaugnay ng paggamit ng mga paputok sa pagsalubong sa Bagong Taon.

Naging kapansin-pansin din ang limitadong bilang ng mga taong nagpaputok at makikita ding nakuntento na ang Sorsoganon na manood na lamang sa mga community fireworks display na pinangunahan ng mga local government unit (LGU) sa kani-kanilang mga lugar.

Taliwas naman sa naging karanasan noong araw ng pasko kung saan naging mahangin at maulan, naging maganda ang lagay ng panahon mula noong huling araw ng 2011 hanggang sa kasalukuyan kung kaya’t mas naging kampante at masaya ang pagdiriwang ng bagong taon ng mga residente.

Sa mga ipinaabot namang ulat ng iba’t-ibang mga ahensya ng pamahalaan, nagkakaisa ang mga ito sa kanilang pagtatasa na naging matiwasay ang ginawang pagsalubong ng mga taga-Sorsogon ng Bagong Taon.

Maging ang Bureau of Fire Protection ay wala ding naiulat na mga insidente ng sunog sa buong lalawigan sa nakalipas na selebrasyon.

Nagpasalamat naman sa mga Sorsoganon ang pamunuan ng Philippine National Police dito sa pakikiisa nito sa kanilang kampanya na mapanatili ang kapayapaan at kaayusan sa panahon ng pagdiriwang ng Bagong Taon dahilan upang wala silang maitalang mga malalaking krimen kaugnay ng selebrasyon.

Subalit hindi naman ikinaila ni Sorsogon City Police Chief PSupt Edgardo Ardales  ang kanyang pagkalungkot na sa kabila ng kanilang pinaigting na kampanya ay may isang kaso silang naitala na nabiktima ng ligaw na bala sa Brgy. Gimaloto, West District, Sorsogon City kaugnay ng pagsalubong ng Bagong Taon.

Matatandaang una nang itinaas ng PNP ang full alert status at bago pa man dumating ang selebrasyon ng pasko ay tiniyak na rin nilang nasilyuhan na nila ang mga baril ng mga kapulisan upang maiwasan ang ganitong mga pangyayaring maaaring magsangkot sa kanilang hanay at nagtalaga rin sila ng mga dagdag na tauhan upang matiyak ang seguridad ng komunidad sa buong lalawigan.

Sa ngayon ay nananatili pa ring blangko ang PNP kung sino ang responsable sa pagpapaputok ng baril subalit tiniyak ng Sorsogon City Police na patuloy nilang iimbestigahan ito upang papanagutin ang sinumang lumabag sa batas.

Samantala, nanawagan naman ang simbahang katoliko sa pamamagitan ni Sorsogon Bishop Arturo M. Bastes sa mga mananampalataya na higit na maging malapit sa Panginoon at huwag mawalan ng pag-asa sa kabila ng mga nararanasang pagsubok.

Sinabi din ng Obispo sa kanyang mensahe sa isinagawang New Year’s eve mass alas onse ng gabi noong huling araw ng Disyembre 2011 na salubungin ang taong 2012 na puno ng pagmamahalan at pagkakaisa sapagkat ito umano ang magsisilbing buklod upang makamit ang kapayapaan sa puso ng bawat isa. (PIA Sorsogon)