2010 NATIONAL LITERACY AWARDS VALIDATION COMMITTEE BUMISITA SA SORSOGON CITY

Tagalog News Release

SORSOGON PROVINCE – Nitong nakaraang lingo ay dumating ang mga hurado ng 2010 National Literacy Awards sa pangunguna ni Program Development Director Emilyn Libunao ng Philippine Information Agency na siya ring tumatayong 2010 national chair of the board of judges, at Dr. Norma Salcedo, secretariat head ng Literacy Coordinating Council upang i-asses at i-evaluate ang Literacy Program ng lungsod o mas kilala dito bilang Linang Dunong Program.

Ang lungsod ng Sorsogon ay isa sa limang lungsod sa buong bansa na mapalad na nakapasok sa 2010 National Literacy Awards Outstanding LGU – component city category.

Partikular na tinutukan ng mga hurado sa kanilang on-site validation ang Computer Van Aralan, Bacon Community Learning Center, Kiddie Toy Center and Library, Bibincahan Nursery, Maharlika Development Cooperative, Sa Aton Ini, Water Treatment Facility, Office of the Senior Citizen Affairs Office, Sorsogon City Teen Center at ang Pangpang Community Learning Center na siyang itinataguyod ng Literacy Program ng lungsod.

Sa ginawang validation, tatlong criteria ang tinutukan ng mga hurado na kinabilangan ng project planning and development (15 percent), project management and implementation (40 percent), at impact of the project (45 percent).

Ang limang lungsod na naglalaban-laban ngayon para sa 2010 National Literacy Awards ay ang Tagum City sa Davao Del Norte, Malaybalay City sa Bukidnon, Balanga City sa Bataan, Cadiz sa Negros Occidental at ito ngang Sorsogon City dito sa lalawigan ng Sorsogon.

Sa muling pagkakabilang ng Sorsogon City bilang isa sa limang mga lungsod sa buong bansa na pasok sa 2010 National Literacy Awards, naniniwala si Sorsogon City Mayor Leovic R. Dioneda na manalo o matalo ay magbubunga ito ng higit na maayos at malawak na paglinang ng kaaalaman para sa mga taga-lungsod.

Ayon pa kay Dioneda, layon ng kanyang administrasyon sa pamamagitan ng literacy program na ito ng lungsod na kahit man lang isa sa mga maralitang kasapi ng pamilya ay makatapos ng kanilang pag-aaral. (Bennie A. Recebido, PIA Sorsogon)