CVO nag-abiso sa tamang pangangalaga ng mga aso

Ni: Francisco B. Tumalad, Jr.

LUNGSOD NG SORSOGON, Hulyo 19 (PIA) – Muling nanawagan si Sorsogon City Veterinarian Dr. Alex Destura sa mga may alagang aso na upang masigurong ligtas ang mga ito sa sakit tulad ng Respiratory Diseases ay kailangan nilang pagawaan ito ng sariling kulungan o di kaya’y itali, pakainin ng mabuti at bigyan ng malinis na inuming tubig at bitamina.

Aniya, dapat na maisaalang-alang ng mga may alagang aso ang kaligtasan din ng kalusugan ng kanilang mga sarili at maging ng kasapi ng pamilya nito.

Maliban sa magiging pag-aalala nila kapag magkasakit ang kanilang mga alagang aso ay maaari din umanong mahawaan ng sakit ang kasapi ng kanilang pamilya, kung kayat mahigpit ang panawagan nito na tiyaking ligtas sa sakit ang kanilang mga alaga sa pamamagitan ng pagbibigay ng tamang atensyon at pangangalaga dito.

Dagdag pa ng beterinaryo na sa mga nagbubuntis namang aso ay dapat na dagdagan ang pagkaing ibibigay dito lalo na ang mga pagkaing nagbibigay ng bitaminang calcium at phosporous upang ang mga nasa sinapupunan nito ay maging malakas at maresistensya paglabas.

Nagbabala rin si Destura sa publiko na puspusan pa rin ang kanilang paghuhuli ng mga galang aso at umaabot na umano sa P500 ang penalidad na ipapataw sa mga may-ari ng aso sakaling mahuli ang kanilang mga alagang aso na nakakalat sa kalsada.

Samantala, sinabi rin ni Destura na isa sa mga pangunahing naapektuhan ng sobrang pag-iinit at sobrang pag-uulan dala ng pabago-bagong panahon dito sa isang lugar ay ang mga alagang hayop lalo na yaong mga nasa kabukiran kung saan nagkakaroon ng biglaang pagdami ng mga langaw, lamok at garapata na nagdadala ng sakit sa mga hayop.

Kaugnay nito, nag-abiso si Destura sa mga may-ari ng kalabaw, baka at iba pang hayop na pabakunahan ang mga ito sa edad na tatlong buwan at bawat taon upang makaiwas ito sa anumag mga sakit. (FTumalad/BARecebido, PIA Sorsogon)