Mga bata dapat ding sanayin ukol sa kahandaan sa mga kalamidad

Ni: Bennie A. Recebido

LUNGSOD NG SORSOGON, Agosto 8 (PIA) – Sa kasalukuyang mga kaganapan sa kalakhang Maynila kung saan nagkaroon ng malawakang pagbaha, dapat umanong hindi lamang nakatuon sa mga opisyal ng barangay, magulang o mga adult ang gagawing pagtuturo ng disaster preparedness sa komunidad.

Ito ang naging pahayag ni Girl Scout of the Philippines (GSP) Sorsogon Council Executive Sarah Ebdani kung saan sinabi niyang mahalagang maturuan din ang mga bata kung paanong ililigtas ang kanilang mga sarili lalo na sa panahong nagkakaroon ng sakuna tulad ng bagyo, baha at landslide.

Aniya, bahagi na ng kanilang taunang pagsasanay ang Service Auxilliary Volunteer for Emergency and Relief (SAVER) Program kung saan sinasanay nila ang mga mag-aaral na babaeng scout mula sa tinatawag nilang twinklers o pre-schoolers, star scouts o yaong Grade One hanggang Grade Three pupils, Junior Girl Scouts o mga Grade Four hanggang Grade Six pupils at Senior Girl Scout naman sa sekundarya kung paano silang maihahanda sa mga sakuna at pangyayaring hindi alam kung saan at kung kailan mangyayari.

Nakapaloob sa kanilang pagsasanay ang educational leadership, emergency action drill, life saver’s drill at basic navigation. Ang mga kasanayang ito umano ang magiging sandata nila sakaling maharap sa mga sakuna o hindi inaasahang pangyayari dala ng natural o maging ng mga sinadyang kaganapan.

Binigyang-diin din niya ang kahalagahan ng Family Disaster Plan kung saan sa pamamagitan umano nito ay magkakaroon ng isahang kaisipan, desisyon at mga paggalaw ang bawat kasapi ng pamilya. Sa ganitong paraan ay maiiwasan ang mga aksidente at wala sa panahong pagkawala ng buhay at ari-arian.

Samantala, matatandaang kamakailan lamang ay nagkaroon ng pirmahan ng Memorandum of Agreement (MOA) sa pagitan nina Department of the Interior and Local Government (DILG) Sec. Jesse Robredo at GSP National President Dr. Salud Bagalso kung saan magiging katuwang na ng DILG ang buong puwersa ng GSP sa pangangalaga ng kalikasan, partikular sa tuwing may mararanasang kalamidad ang bansa.

Kilala ang GSP bilang isang national civic organization para sa mga batang babae na ang misyon ay tulungang maging handa ang kanilang mga miyembro sa mga responsibilidad na kanilang kaakibat sa paglaki, hindi lang sa kanilang mga bahay kundi pati sa kanilang komunidad. (BARecebido, PIA Sorsogon)