Karapatan ng mga bata muling ipinaala sa publiko

Ni: Bennie A. Recebido

Lungsod ng Sorsogon, September 12 (PIA) – Muling ipinaalala ng Philippine Information Agency (PIA) Sorsogon Information Center sa publiko ang pangangalaga sa karapatan ng mga bata o yaong mga menor de edad sa gitna ng patuloy na pagtaas ng bilang hindi lamang ng mga batang nabibiktima ng rape dito sa Sorsogon kundi maging ng mga diumano’y menor de edad na nagagamit sa mga krimeng tulad ng pagnanakaw.

Sa ilalim ng Republic Act 7610 o ang Special Protection of Children Against Child Abuse, Exploitation and Discrimination Act at Article XV, section 3 ng Philippine Constitution, protektado nito ang mga bata at kabataan laban sa anumang uri ng gawaing aabuso sa kanilang mga karapatan.

Kabilang sa mga karapatang ito ng mga bata na dapat isa-alang-alang ay mga sumusunod: karapatang mabuhay, magkaroon ng pangalan at pagkakakilanlan, maging malaya, magkaroon ng pamilya, magandang edukasyon, sapat na pagkain, kalusugan at aktibong pangangatawan, mabigyang oportunidad na makapaglaro at makapagpahinga, malayang makapagpahayag ng kanilang mga nararamdaman, mamuhay ng mapayapa sa isang komunidad, matulungan at maipagtanggol ng pamahalaan at mabigyan ng proteksyon laban sa anumang pang-aabuso, panganib at dahas.

Maging ang Department of Interior and Local Government (DILG) ay naglabas din ng Memorandum Circular No. 2008-126 na nag-aatas sa mga gobernador, alkalde, punong barangay at DILG regional director na pag-aralan ang nirebisang panuntunan sa pagsubaybay sa pagpapatupad ng mga Local Council for the Protection of Children sa lahat ng lebel.

Malaking tulong diumano ang ang pagpapaigting ng LCPC sa mga bayan at lungsod partikular sa mga barangay upang masubaybayan ang mga galaw ng kabataan at magiyahan ang mga ito pati na ang mga magulang at buong komunidad tungo sa pagbibigay proteksyon sa mga bata o menor de edad.

Matatandaang sa ipinalabas na national statistic, nasa 2.4 milyon na mga bata ang sa ngayon ay lantad sa mapanganib na kapaligiran kabilang na ang pagiging lantad nito sa mga pang-aabusong sekswal. (PIA Sorsogon)

BSP National Jamborette sa Sorsogon hindi na matutuloy

Ni: Bennie A. Recebido

Lungsod ng Sorsogon, September 12 (PIA) – Dahilan sa iba’t-ibang mga sirkumstansya, tuluyan nang idineklara ng tanggapan ng Boy Scout of the Philippines (BSP) Sorsogon Council na hindi na matutuloy ang BSP National Encampment na dapat sana ay gagawin dito sa lalawigan ng Sorsogon ngayong taon.

Ayon kay BSP Sorsogon Council Executive Rene Hayag, matapos silang magsagawa ng ocular inspection sa Brgy. San Isidro, Castilla, Sorsogon kung saan doon sana idaraos ang aktibidad, nakita nila ang mga kakulangang sa tingin nila ay imposible nang agarang matugunan kung ipagpapatuloy pa ang aktibidad ngayong 2011.

Aniya, handa na ang lugar kung ground preparation ang pag-uusapan, subalit kailangan diumanong isa-alang-alang ang kawalan pa rin ng akses ng lugar sa malinis na tubig at hindi pa maayos na akses sa transportasyon patungo sa Camping Site.

Dagdag pa niya na sa ngayon ay walang gaanong kakayahan ang BSP Sorsogon Council na tustusan ang isang national encampment dahilan din sa kakulangan ng pondo ng Sorsogon BSP Council.

Subalit tiniyak naman ni Hayag na hindi man natuloy ngayong taon ay tiyak ding maisasakatuparan ang pagsasagawa dito sa lalawigan ng Sorsogon ng national encampment sa mga susunod na taon lalo na’t hindi ito ang kauna-unahang nakapagsagawa ng kahalintulad na aktibidad ang Sorsogon.

Tiniyak din nitong bago matapos ang taong 2011 ay makapagsasagawa sila ng local Boy Scout Jamborette dito.

Kaugnay nito, hiniling ni Hayag ang tulong lalo na sa aspetong pinansyal ng mga lokal na pamahalaan upang matugunan ang mga kakulangang nakita nila nang sa gayon ay matustusan at maging matagumpay ang gagawing mga aktibidad ng BSP Sorsogon. Nanawagan din ito sa publiko na makiisa sa kanilang mga adhikain para sa pagsusulong ng mga kasanayan at ng Vision-Mission ng Boy Scout of the Philippines. (PIA Sorsogon)

PILAR LGU to enter into a MOA with a Korean firm for the establishment of an Integrated Sanitary Land Fill and Material Recovery Facility

By Irma A. Guhit

SORSOGON CITY , SEPTEMBER 9 (PIA)…. A memorandum of agreement (MOA) is now on the process of review and consultation, submitted by the Local Government of Pilar to the Department of Environment and Natural Resource (DENR), RO 5 for comments and suggestions in the hosting of an integrated sanitary  landfill (ISL)  and material recovery facility  (MRF) with a Korean firm, the Pilar Jeong Sol Green Technology Limited (PJSGTL).

In a dialogue with Mayor Dennis Reyes of Pilar town, during the 3^rd quarterly meeting of the Provincial Solid Waste Management Board last week, together with  Vice Mayor Celso Lao, Jr.  and several members of the Sanggunian Bayan, the desire to push through this project , according to them is borne out of the requirement of the DENR that each local government unit must have a sanitary landfill and material recovery facility under the RA 9003 of 2000 otherwise known as Philippine Ecological Solid Waste Management Act of 2000.

“For a local government like Pilar, whose internal revenue allotment is not enough to finance the establishment of a sanitary landfill since it is very expensive and like us with our budget so meager, it will be very difficult to comply with this RA 9003”, Mayor Reyes said.

“In consultation with the members of the Sanggunian Bayan we have to look for alternative source on who can assist us finance this kind of requirement and at the same time generate jobs and add on income for Pilar”, he said.

The proponent, PJSGTL will undertake the design, finance construction and management of the ISL and MRF according to Mayor Reyes.

According to Reyes, a 30 ha lot will be purchased by the proponent for the establishment of the ISL . In the MOA all stipulated agreements between PILAR LGU and the proponent will be reviewed by DENR.

The ISL and MRF as Pilar LGU intends to pursue will also provide the proponent shipment of scrap materials that can be processed within the MRF and will again be shipped for export to other countries.

Some issues on the agreement where already raised to the several persons concerned during the meeting with Mayor Reyes.

 A very clear provision on the MOA is that no prohibited wastes as stated in article 5 of the MOA be allowed specially pathological wastes, wastes and by products from clinics, laboratories, hospital and other similar sources.

It was also stipulated in the MOA that industrial wastes specially those that are toxic and containing hazardous substances will not be allowed and there will be strict inspection on what kind of wastes will be brought to the ISL.

The materials to be processed in the MRF were well identified in Article 4 of the MOA and according to Mayor Dennis all provisions of the DENR will be strictly followed.

In the MOA, the MRF will only be operating on the following: as paper bailing press that will serve as the scraps paper bonding press, pelletizer of the recyclables plastics, injection moulding machines, can compactor for beer, soft drink cans and other similar items, food waste composting facility, incinerator  and sanitary landfill.

According to Mayor Reyes the agreement will be valid within 25 years and the economic benefit will have a 15% of the gross income for the LGU and the continuous development within the area including employment and infrastructure development that will ensure environmental protection.(PIA-SORSOGON)

Kasanggayahan Festival 2011 Press Conference isasagawa

Ni: Bennie A. Recebido

Sorsogon City, September 9 (PIA) – Isang press conference ang isinasagawa ngayon kaugnay ng mga gagawing aktibidad ng Kasanggayahan Festival sa susunod na buwan ngayong taon.

Layunin ng press conference na maiprisinta ang pinal at aprubadong mga aktibidad sa Kasanggayahan Festival 2011 ngayong Oktubre kung saan mayroon itong aktibidad sa kultura at sining, tugtugan at sayawan, industriya at kalakal, sports events, socials, special interest at self development. 

Subalit nilinaw ni Michael B. Sulit, Sorsoganon Kita, Inc. President na nanatili pa ring bukas para sa mga obserbasyon, komento at suhestyon ang mga ipiprisintang aktibidad upang matiyak na magiging matagumpay ang gagawing festival ngayong taon.

Ilan sa mga bagong aktibidad na ilulunsad ay ang Piridalan sa Dalan, Singing Councilors, Choral Competition, Sorsogon Idol, Rokyaw Kasanggayahan kung saan pararangalan ang mga natatanging Sorsoganon, Photography Workshop, Bridal Fair, National Body  Contour, Regional Band and Majorette Competition, Regional Cooperative Congress at Mardi Gras.

Habang ang mga aktibidad namang sa tuwina ay inaabangan na ng publiko ay ang Historico Cultural Parade, Inter-Municipal Drum and Lyre Competition, Gibalong Mass, Sorsogon Heritage Lecture at Pantomina sa Tinampo.

May temang Going Beyond: Public-Private Partnership Towards Sustainable Development, opisyal na magsisimula ang naturang festival sa unang araw ng Oktubre na magtatagal ng isang buwan.

Napili umano ang temang ito bilang paalala sa lahat ng mga stakeholders na tuparin ang kani-kanilang mga papel na ginagampanan sa pag-unlad ng Sorsogon at sa pagsusulong ng positibong samahan ng mga pampubliko at pampribadong sector. (PIA Sorsogon)

Mga ospital dapat na sumunod sa tamang pagtapon ng mga basura

Ni: Bennie A. Recebido

Lungsod ng Sorsogon, September 9 (PIA) – Matapos ang ginawang monitoring, evaluation at assessment ng Environment and Management Bureau (EMB) ng Department of Environment and Natural Resources (DENR) ukol sa mga paraan ng pagtapon ng basura ng mga ospital sa Sorsogon, na kinabibilangan ng isang public at isang private tertiary hospital at apat na secondary private at dalawang secondary public hospital, lumabas na lahat ng mga ito ay hindi nakasunod ng tama alinsunod sa probisyong nakasaad sa Republic Act 6969 o ang “Toxic Substances and Hazardous and Nuclear Wastes Control Act of 1990”.

Ayon kay Engr. Leonisa Madeloso, kinatawan ng EMB-DENR, gumagamit lamang ng chlorine at Lysol bilang disinfectant ng mga itinatapong basura ang nasabing mga ospital.

Karamihan din diumano sa mga ospital ay walang permit para sa mga itinatapong tubig nito, walang solid waste management report at karamihan sa mga heringgilya, sirang bumbilya at fluorescent lamp, at iba pang mga basura ng ospital ay hindi naitatapon ng maayos.

Kaugnay nito, nagpadala ng notice of violation ang EMB at nakipagdayalogo sa mga kinauukulan ukol sa tamang pagtapon ng mga basura ng ospital upang hindi ito makaapekto sa kalikasan at makapagdulot ng panibangong suliraning pangkalusugan sa publiko.

Iminungkahi din ng EMB ang pagkakaroon ng sariling Pollution Control Officer ng mga ospital na siyang mangangasiwa sa paghihiwa-hiwalay ng mga basurang may mga heringgilya, dextrose, at iba pang gamit sa operating room lalo na kung ang pasyenteng gumamit nito ay may nakakahawang sakit. Dapat ring i-sanitize muna ang itatapong basura at lagyan ito ng marka upang madaling matukoy kung ito ay mayroong mga kemikal na maaring makasama sa kalusugan ng tao.

Samantala, tinalakay naman sa isinagawang pulong ng Provincial Solid Waste Management Board (PSWMB) kamakailan ang panganib na dala ng mga basurang naiipon at kawalan ng maayos na tapunan ng mga ospital dito, pati na rin ang mga solusyon at penalidad sa paglabag sa Republic Act 6969.

Nakatakda ding iprisinta ng PSWMB ang mga lumabas na isyu sa pulong na gagawin ng League of Municipalities (LMP) nang sa gayon ay maipaalam ito sa mga alkalde at kung papaanong matutugunan ang mga isyung ito upang makasunod sa probisyong nakasaad sa RA 6969 ang mga ospital sa kanilang nasasakupang lugar.

Lumabas din sa pulong na kailangang makabuo ng Provincial Monitoring Team na siyang susubaybay at magtatasa sa pagpapatupad ng RA 6969. (PIA Sorsogon)