NGCP higit pang pinagaganda ang serbisyo para sa kapakanan ng mga manggagawa nito

Ni: Bennie A. Recebido

LUNGSOD NG SORSOGON, Hulyo 31 (PIA) – Upang mapaganda pang serbisyo ng National Grid Corporation of the Philippines (NGCP) para sa kanilang mga empleyado, inaprubahan ng pamunuan nito kamakailan ang pagbubuo ng NGCP Employees’ Multi-Purpose Cooperative (NEMCO).

Ayon kay Atty. Cynthia P. Alabanza, NGCP Spokesperson/Adviser for External Affairs, dinisenyo ang NEMCO upang makatulong sa mga empleyado nito sa pamamagitan ng pagbubukas ng serbisyo sa pagapautang tulad ng pagbibigay ng Education, Emergency at Short-Term Loans sa mga member-employees nito.

Maglalagay din sila umano ng additional loan windows at consumer services at maging ang pag-isyu ng gift check ay isasabay din hanggang sa tuluyan nang maging maayos ang operasyon ng nasabing kooperatiba.

Sinabi pa ni Alabanza na pamumunuan ang NEMCO ng mga ihahalal na Board of Directors ng mga kasaping-manggagawa nito, Regular Member at Associate Member ang dalawang kategorya ng mga kasapi nito.

Ang regular member ay yaong mga opisyal ng NGCP, executive at regular employees habang ang associate member naman ay kabibilangan ng mga NGCP consultant at dating mga regular member na nagsipagretiro na subalit nais pang ipagpatuloy ang kanilang membership.

Sa ngayon aniya ay bukas parin ang NEMCO sa pagtanggap ng mga nais maging kasapi at naghahanda na rin para sa pagpaparehistro nito sa Securities and Exchange Commission (SEC).

Target ng NGCP ngayong Agosto na gawing full operational ang NEMCO. Naniniwala silang sa pamamagitan nito ay higit pang mabibiyayaan ang mga manggagawa ng NGCP maliban pa sa magiging empowered, highly motivated, at self-reliant ang mga ito. (BARecebido, PIA Sorsogon/NGCP)