City Vet magsasagawa ng libreng Spaying at Neutering sa mga aso

LUNGSOD NG SORSOGON, Agosto 29 (PIA) – Nakatakdang magsagawa ng libreng spaying at neutering o pagkakapon ng mga aso ang tanggapan ng Sorsogon City Veterinary sa darating na ika-4 ng Setyembre ngayong taon.

Kaugnay nito nanawagan si City Veterinarian Dr. Alex Destura sa mga residente ng Sorsogon na samantalahin ang oportunidad na ito nang sa gayon ay matugunan ng lungsod ang suliranin sa paglobo sa bilang ng mga aso at ang maaaring pagkalat ng rabis.

Sa impormasyong ibinigay ni Media Relations Officer Arwill Liwanag ng Sorsogon City Veterinary Office ang naturang aktibidad ay isasagawa sa Plaza Bonifacio sa Brgy. Sirangan, Sorsogon City sa dating paradahan ng mga sasakyan ng traysikel sa syudad mula alas otso ng umaga hanggang alas singko ng hapon.

Inaasahan din ang pagdating ng mga beterinaryo at ilang mga tauhan ng Department of Agriculture Regional Office V upang tumulong sa gaganaping aktibidad.

Patuloy din ang paghikayat nila sa publiko na suportahan at tangkilikin ang nasabing aktibidad lalo’t wala namang anumang babayaran sa naturang serbisyo at ang tanging kailangan lamang ay dalhin ang kanilang mga alagang aso para mabiyayaan ng nabanggit na libreng serbisyo.

Samantala, patuloy pa rin ang Sorsogon City Veterinary Office sa panghuhuli ng mga asong gala sa buong syudad kasama na ang pagbabakuna ng libre ng anti-rabis sa mga aso. (FBTumalad/BARecebido, PIA Sorsogon)