20 “Casko” naipamahagi na sa Pto. Diaz

Ni: Bennie A. Recebido

LUNGSOD NG SORSOGON, Agosto 20 (PIA) – Labis na ikinatuwa ng mga mangingisda sa Brgy Diamante, Prieto Diaz, Sorsogon ang isinagawang inagurasyon at turn-over ceremony kamakailan ng 20 bilang ng “Casko” o bangkang pangisda sa mga kasapi ng Samahan ng Maliliit na Mangingisda sa Diamante (SAMAMADIA)

May mga angkla at lubid din silang natanggap kasama ng 20 mga “Casco”.

Ayon sa ilang miyembro ng samahan, matagal na panahon din nilang hinintay ang pagkakataong ito na magkaroon ng sariling bangka, kung kaya’t lubos ang kanilang pasasalamat sa ibinigay na pagkakataong ito.

Naging bahagi ng ginawang aktibidad na may temang “Proyektong Inaasam, Aming Nakamtan” ang pagbigay ng pagkilala sa mga kasapi at mga indibidwal na nasa likod ng matagumpay at matatag nilang samahan, ang SAMAMADIA.

Inihayag naman ni Pto. Diaz Mayor Benito Doma ang labis niyang kasiyahan sa oportunidad na ibinigay na ito sa mga kasapi ng SAMAMADIA na naisakatuparan sa pagtutulungan ng KALAHI-CIDDS ng Deparment of Social Welfare and Development (DSWD), LGU-Prieto Diaz, mga opisyal ng barangay at residente ng Bgy. Diamante.

Hinimok din ni Mayor Doma ang mga mangingisda na gamitin ang anumang biyayang natatanggap sa tamang paraan at gawing daan ito sa pagkamit sa kanilang mga pangarap.

Naging panauhing pandangal naman si Sorsogon Provincial Administrator Robert Lee Rodrigueza sa nasabing okasyon. Sa mensahe ni Administrator Rodrigueza, sinabi nitong marapat lamang na ingatan ng makakatanggap ng mga “Casco” dahil ito umano ang magsisilbing katulong nila sa pang-araw-araw na paghahanap-buhay.

Dagdag pa ni Administrator Rodrigueza, na hindi rin magsasawa ang pamahalaang probinsyal ng Sorsogon sa pamumuno ni Gov. Raul R. Lee, na magbigay ng tulong sa mga residente ng Pto. Diaz lalo na kung para sa ikakabuti ng mga ito.

Dumalo din sa okasyon ang kinatawan ng DSWD Regional Office V na si Engr. Armand Michael Timplada na nagbigay din ng mensahe sa SAMAMADIA na ingatan ang mga gamit pangisdang matatanggap at nangakong may mga darating pang karagdagang “Casco” para sa iba pang mga kasapi ng samahan. (BARecebido, PIA Sorsogon/LJimenez)