Small Unit Operation Training ng Philippine Army at PNP nagsimula na

Ni: Bennie A. Recebido

Lungsod ng Sorsogon, Agosto 15 (PIA) – Sinimulan na noong Lunes, Agosto 12, 2013, ang unang araw ng Small Unit Operation Training Class-01-13 ng 54 na mga kasapi ng Philippine Army at Philippine National Police (PNP) sa mismong kampo ng 903^rd sa Bgy. Poblacion bayan ng Castilla, Sorsogon.

Ayon kay 903^rd Brigade Commander Joselito E. Kakilala, ang pinagsanib na pagsasanay na ito ng mga sundalo at pulis ay upang mas mahasa pa ang inter-operability o capability ng mga kasapi ng Philippine Army at Philippine National Police (PNP) sa pagsugpo ng mga armadong grupo at masasamang elementong nagdadala ng kaguluhan sa Sorsogon.

Sinabi pa ni Col. Kakilala na nais nilang palawakin pa ng husto ang pagkatuto at kasanayan ng mga kasundaluhan at kapulisan na palaging nakasuong sa panganib ang mga buhay.

Ito umano ang kauna-unahang joint training ng Philippine Army at PNP na isinagawa ng 903^rd Brigade.

Labing-anim (16) na mga pulis mula sa PNP Sorsogon, 24 na sundalo mula sa 31^st Infantry Brigade na nakabase sa Rangas, Juban, at 14 na sundalo mula sa 903^rd Brigade ang isinailalim sa nasabing pagsasanay.

Bahagi ng training ang pagbibigay sa kanila ng refresher lecture na una na nilang pinagdaanan ng mag-umpisa silang pumasok sa ganitong propesyon tulad ng General Information Module, Military Courtesy and Discipline, Bayanihan Best Practices, Individual Skills Development Module, Small Unit Leadership, Troop Leading Procedure, Map Reading at Land Navigation.

Sasailalim din sila sa Squad Tactics, Immediate Action Drill at iba pang Field Training Exercises para mas mapapalim pa ang kanilang kakayahan bilang mga sundalo, lalo na pagdating sa mga combat operation.

Magtatagal ng isang buwan Small Unit Operation Training ng mga ito kung saan magiging taga-pagsanay nila dito ang mga batikang instructor ng Scout Rangers at Special Forces mula sa Battalion at 903^rd Brigade.

Samantala, nagpaabot din ng mensahe ng inspirasyon si Police Supirentendent Edgar Ardales, Deputy Director ng Police Provincial Office sa mga sinasanay na pulis at sundalo at sinabi din niyang bahagi lamang ng kanilang propesyon ang pagsasanay na ito na tiyak na makakatulong sa kanila sa lahat ng mga gagawin nilang operasyon. (BARecebido, PIA Sorsogon/LJimenez)