Comelec muling nagpaalala sa pagsusumite ng CoC, ilang mahalagang isyu nilinaw

LUNGSOD NG SORSOGON, Oktubre 14 (PIA) – Nagpaalala si Provincial Election Supervisor Atty Calixto Aquino sa mga balak kumandidato ngayong darating na halalan sa barangay na hanggang sa Huwebes, Oktubre 17, na lamang sila maaring magsumite ng kanilang Certificate of Candidacy (CoC).

Aniya, mas makabubuting huwag na nilang hintayin pa ang huling araw ng pagsusumite ng CoC upang maiwasan ang anumang mga pagkakaantala o di kaya’y pagsisiksikan sa loob ng tanggapan ng Comelec.

Sinabi din ni Atty. Aquino na bukas ang kanilang tanggapan mula alas-otso hanggang alas-singko ng hapon kahit sa araw na deklaradong pista opisyal. Sa lalawigan ng Sorsogon dalawang pista opisyal ang natapat sa itinakdang pagsusumite ng CoC, ang Oktubre 15 para sa pagdiriwang ng Eidul Adha at sa Oktubre 17 para sa paggunita ng ika-119 na anibersaryo ng Sorsogon bilang hiwalay na lalawigan sa Albay, subalit malinaw na sinabi ni Atty. Aquino na hindi ito makakahadlang sa pagsusumite ng CoC ng mga nais kumandidato para sa halalang pambarangay.

Maayos din umano ang daloy ng mga gawain sa lahat ng tanggapan ng Comelec sa kasulukuyan, subalit patuloy pa rin silang nanawagan na maging disiplinado ang mga kakandidato upang walang aberyang maganap at mga suliraning kaharapin hanggang sa matapos ito.

Nilinaw din ni Atty. Aquino ang ilang mga isyung hindi gaanong naunawaan tulad ng paghingi ng balidong Identification Card sa mga nagsusumite ng CoC sa Sorsogon City. Aniya, kung ang kakandidato ay may dala nang notaryadong CoC ay hindi na ito hihingian pa ng valid ID, subalit kung hindi pa ito notaryado, ay maari nang mismong sa election officer na abogado na lamang ito manumpa para sa notaryo, dangan nga lamang at kailangang magpakita ito ng valid ID para sa opisyal na pagkakakilanlan ng manunumpang kandidato. (BARecebido, PIA Sorsogon)