Mga mamamahayag maaari nang mag-aplay ng Local Media Accreditation para sa Halalan 2013

Ni: FB Tumalad

LUNGSOD NG SORSOGON, Marso 11 (PIA) – Matapos makipag-ugnayan sa tanggapan ng PIA at maipaliwanag sa mga media ng Sorsogon noong Pebrero 19, 2013 ang Local Absentee Voting (LAV) at ilan pang mahahalagang impormasyon kaugnay ng darating na halalan sa Mayo 2013, muling nakipag-ugnayan sa PIA Sorsogon si Provincial Election Supervisor Atty. Calixto Aquino Jr. upang matulungan ang Comelec Sorsogon para sa aplikasyon naman ng akreditasyon ng mga lokal na  mamamahayag.

Ayon kay Atty. Aquino, ang Local Media Accreditation (LMA) ay iniisyu para lamang sa mga lokal na mamahayag na aktibo sa serbisyo. Sa pamamagitan umano ng akreditasyong ito ay bibigyan sila ng Identification Card (ID) na pirmado ng komisyon nang sa gayon ay madali silang matukoy kung sila nga ay lehitimong media na nagsasagawa ng coverage sa panahon ng eleksyon.  

Kinakailangan lamang umanong isulat sa LMA Form ang buong detalye ng pagkatao ng media na nais magpa-akredit, pati na ang pangalan ng pinagsisilbihang istasyon at kung saan  ito madedestino  sa araw ng eleksyon.

Bawat kasapi ng media na mag-aaplay ng media accreditation ay magsumite ng tatlong piraso ng porma na lalakipan ng 2x2 ID picture.

Maaaring makakuha ng local media accreditation form sa tanggapan ng Comelec o sa PIA Sorsogon.

Kinakailangan umanong maisumite ang naturang aplikasyon sa tanggapan ng Comelec simula ngayon at hindi lalagpas ng Abril 15, 2013.

Kalakip sa aplikasyon ang indorsement letter ng kanilang pinagtatrabahuang istasyon ng radyo, telebisyon, pahayagan o ahensya ng balitaan sa internet. (FB Tumalad, PIA Sorsogon)