DENR nagpalabas ng bagong code of practice sa refrigeration at airconditioning

Ni Sally A. Atento

LEGAZPI CITY, Apr 26 (PIA) -- Nagpalabas ang Department of Environment and Natural Resources (DENR) ng bagong Code of Practice (COP) para sa industriya ng Refrigeration and Air Conditioning (RAC) matapos ang phase-out o pag-alis ng mga Chlorofluorocarbons (CFCs) at iba pang ozone depleting substances (ODS) o mga uri ng kemikal na nakasisira sa ozone layer.

Kasama sa nasabing COP ang pagdagdag ng bagong sistema at teknolohiya na makatutulong upang mapangalagaan an gating kapaligiran.

Ayon kay DENR Bicol regional executive director Gilbert Gonzales mahalaga ang nasabing COP sa paggabay sa mga apektadong sektor sa pagsunod sa mga binagong probisyon at sa paggamit ng makabagong teknolohiya na makatutulong upang maiwasan ang pagkasira ng kapaligiran.

Dagdag pa ni Gonzales, kabilang sa COP ang conversion ng mga refrigerants at paggamit ng mga alternatibong maaring ipalit sa CFCs at ibang ODS gayundin ang tamang paghawak, pagtago, pagresiklo, pagkilekta at pagtapon ng mga refrigerants.

Kanya ring ipinaliwanag na ang Technical Education and Skills Development (TESDA) ang mangangasiwa upang maisama ang bagong COP sa kurikulum ng kursong Refrigeration and Airconditioning Servicing. (SAA- PIA5/Albay)