Nominasyon sa Gawad Bayani ng Kalikasan sagkod sa Enero 30 na sana

LEGAZPI CITY (PIA) - Sagkod sa Enero 30, 2013 na sana an pag-ako nin nominasyon para sa ika-tulong (3) Gawad Bayani ng Kalikasan, na tatawan nin honra an pitong (7) herowe kan kapalibutan - mga tawo, organisasyon o komunidad na bolahos an pagbubusol sa pangangataman kan kapalibutan saka proteksyon kan deretso nin mga tawo.

Sinabi ni DENR Bicol Regional Executive Director Gilbert Gonzales na tsansa na man kan mga bikolanong indibidwal, organisasyon o komunidad na ibayabay sa enterong nasyon an saindang adbokasiya, kampanya o paghiro saka pagmamakulog sa paagi kan pagsumitir nin nominasyon sa Gawad Bayani ng Kalikasan sa taon na ini.

An nasabing palihan, bukas sa gabos na Pilipino, indibidwal, organisasyon o institusyon na nagbabayabay nin daeng kaarog na abilidad buda paghiro na pangorogon an kapalibutan dangan kapakanan nin mga tawo, sa paagi nin adbokasiya, kampanya, edukasyon, pagsaliksik, pagharubay nin teknolohiya, serbesyo sa komunidad, mass media, o paghirong kultural.

Tolong (3) tawo, tolong (3) organisasyon asin saro (1) an makakagono nin gawad para sa daeng ka-arog o Most Distinguished Award na pipilion nin sarong talingkas na hunta nin mga hukom.

Pwedeng i-download an porma para sa nominasyon saka mga panundanan sa www.cecphils.org o magpasiring sa DENR Regional Public Affairs Office, Rawis, Legazpi City na may telepono numero 482-0857. Para naman sa mga kahaputan, makipaghumapot sa Gawad Bayani ng Kalikasan Secretariat Committee 26 Matulungin Street, Bgy. Central, Quezon City, Philippines 1100 Telefax: 02 920 9099, Mobile: +639178797956. (Ruby L. Mendones, DENR-RPAO/PIA Sorsogon)