DENR nagpatanid liwat sa pagpako nin campaign poster sa mga kahoy

SYUDAD NIN LEGAZPI, Pebrero 8 – Malinaw an ley, papatawan nin pinalidad an siisay man na magpapako nin poster o pandagka sa pangangampanya sa mga poon nin kahoy katakod kan maabot na eleksyon sa Mayo.

Tinawan nin doon ni DENR Regional Executive Director Gilbert Gonzales na ipinagbabawal kan Presidential Decree 953 an siring na gawe saka an mapapatunayan na nagkasala mapapatawan nin pagkakakulong poon anom (6) na bulan sagkod duwang (2) taon buda pinalidad na 500 pisos sagkod 5,000 mil pisos.

Nakiolay man si Director Gonzales sa mga politiko saka mga katood kaini na gibuhong malinig an karampanyahan, likayan an basura, dangan magtakod nin mga poster sa mga designadong lugar kan Commision on Elections (Comelec).

Hinagad niya man an kooperasyon kan mga politiko asin mga suportador na linigon an lugar na pinagsagibuhan pagka igwang “Miting de Avance”, na parte kan pigbubusol kan DENR Bicol na Clean and Trash Free Election.

Sa lindong kan Section 23 kan Comelec Resolution 7767 kasugpon sa Republic Act 9006 o Fair Election Act, pigbabawal man an pagpapadukot, pagpasalunad o pigpapako ki mga campaign poster sa mga poon nin kahoy. (Ruby Mendones, DENRV-RPAO/PIA Sorsogon)