DENR Photo Release and News Releases (In Bikol)

Greeny with Ms. Earth Beauties. Greeny, the DENR Bicol mascot with Miss Earth Beauties lead the warm up exercise prior to the gun start of the 3^rd Bulusan Eco-trail Running Cup organized by the Local Government of Bulusan, Agap Bulusan in cooperation with Bulusan Volcano Protected Area Management Board (PAMB). The fun run yesterday was a venue to promote reforestation through the National Greening Program (NGP) wherein runners get to plant a tree in the  protected area. (Photo:Hazel Manjares/ PIA Sorsogon))

-------------------------------------------------------

BIKOL NEWS:

DENR mataong tabang sa DBP Credit Program para sa mga patanuman nin kahoy

SYUDAD NIN LEGAZPI, Hunyo 23 (PIA) – An Department of Environment and Natural Resources (DENR) matao ki tabang teknikal sa Development Bank of the Philippines (DBP), sarong bangko kan gobyerno sa mga proyektong pagpalangubo nin mga aktwal na plantasyon o patanuman nin kahoy.

Sinabi ni DENR Bicol Regional Executive Director Gilbert C. Gonzales na nagpirma nin kasunduan sinda Environment Sec. Ramon Paje asin DBP President buda CEO Gil Buenaventura tanganing matungkusan an DBP Tree Plantation Financing Program (TPFP), sarong pasilidad nin pautang para sa mga tagsadiri asin tagapamahala nin mga patanuman ki kahoy.

An TPFP nagmamaw-ot na maisadol an pagbubusol saka pagmanetenir kan mga plantasyon nin kahoy, asin sarong mabansay na planong pag-ani na mapapusog sa industriya nin kahoy kan nasyon, laen pa sa tabang sa mga komunidad na mapakarhay an socio-ekonomiya, mapuho an dagos-dagos na pagkakalbo kan kadlagan asin mairayo an mga ini sa mga kalamidad siring kan baha dangan pagrasay nin daga.

Saiyang sinabi na an naunambitang programa nasasaro sa katoyohan kan National Greening Program (NGP)saka Millennium Development Goals (MDG) sa pagpuho kan labing pagtios dangan paggutom asin maseguro sa pagsustenir kan kapalibutan.

Inomaw kan DENR an DBP sa pagsasabing an TPFP sarong bansay na parte kan Corporate Social Responsibility.

An programa masakop sa mga namuknang patanuman nin kahoy - reforestation, forest o industrial - na igwang apat (4) na taon nang nabubuhay na kahoy sa maski sarong porsyentong hikwas ki kwalipikadong pribado saka pampublikong daga na may lima (5) sundo 500 ektarya, may balidong tenurial agreements o kasunduan sa paggamit, pag-okupa buda pagtanom sa lugar.

Sa lindong kan kasunduan, an papel na gagampanan kan DBP iyo an pagtaong tabang pinansyal sa mga proyektong nasasakupan, mantang an DENR, mag-aaram kun nagkakanigo an mga sityo kan proyekto asin mga klaseng pananum na itatanum. An DENR pwede man mag-endorso sa DBP kan mga interesadong kliyente buda tabangan an mga parasubli para sa nasambit na proyekto. (RMendones, DENR-V/PIA Sorsogon)

-----------------------------------------------

PAWB naglaen nin mga tingong ivory para sa museo, eskwelahan

SYUDAD NIN LEGAZPI, Hunyo 23 (PIA) – An Protected Areas and Wildlife Bureau (PAWB) kan Department of Environment and Natural Resources (DENR) nakapagtagama na nin maabot sa 30 pidaso nin tingo kan elepante na isasaray saka gagamiton para sa pag-aadal buda pagtuturo sa mga eskwelahan.

Sinabi ni DENR Bicol Regional Executive Director Gilbert Gonzales, na ini kasunod man kan pahayag ni PAWB Director Theresa Mundita Lim na an planong pagraot sa natadang haros limang (5) toneladang tingo sa paagi kan pagligis kan pison ilalawos sa Hunyo 21, 2013 sa Ninoy Aquino Parks and Wildlife sa syudad kan Quezon.

Ipinahayag ni Dir. Gonzales na sosog sa impormasyon, an mga piniling tingo nin ivory para sana sa bayabay sa edukasyon asin pag-aadal kan National Museum, Commission on Higher Education (CHED) dangan Department of Education (DepEd).

Tinawan niya nin doon na an pangenot na kamawotan kan pagrunot sa mga tingo iyo an pagtungkos sa makusog na pagtindog kan Pilipinas tumang sa illegal na barakalan nin "blood ivory" buda pagpuho sa mga elepante.

Kairiba sa mga mahiriling sa pagpuho kan mga nakumpiskang tingo iyo sinda Director Bonaventure Ebayi kan Lusaka Agreement Task Force kan Nairobi, US Embassy Deputy Chief of Mission Brian Goldbeck, Atty. Brian Christy kan National Georgaphic dangan mga miyembro kan dayuhan asin lokal na media. (RLMendones, DENR-V/PIA Sorsogon)

---------------------------------------------------------------

 Banog, mga ukay pinabuhian sa kadlagan kan BacMan

SYUDAD NIN LEGAZPI, Hunyo 22 – Pinangenotan ni Albay Gov. Joey Salceda an pagpabuhi sa sarong  Banog (serpent eagle) buda onse (11) na ukay (Philippine Cynomolgus Macaque) kan Albay Parks and Wildlife (APW) sa kadlagan kan BacMan katakod kan Environment Month ngonyan na bulan nin Hunyo.

An nasabing pagpabuhi kan petsa 11 sarong lakdang tanganing maibalik giraray an nasabing mga hayop sa saindang natural na erokan. Sinabi ni Gov. Salceda na an siring na lakdang sarong kamawotan kan APW bilang Wildlife and Rescue Center kun saen pinapangatamanan an mga hayop tanganing mibalik sa saindang eerokan pag-abot kan aldaw.

Nagkakapirang mga opisyales kan gobyerno, mga grupong sibiko asin mga taga-prensa an nagpartisipar sa aktibidad na pinadrinohan kan Energy Development Corporation (EDC) bilang pagsadol sa selebrasyon kan Bulan nin Kapalibutan.

Kasabay kaini, tinawan nin doon ni DENR Regional Executive Director Gilbert Gonzales na padagos an pakikipagtabangan kan departamento sa paagi kan Protected Area and Wildlife Sector (PAWD) sa APW sa pagsasapod saka pangataman kan mga buhay-layas para pagdanayon sinda. (RMmendones, DENR-V/PIA Sorsogon)